اتقي شر من أحببيت

عارف ايه اللى هيحصل لو حبيت؟

دايما هيكون فى بينكوا حد بيحب التاني أكتر..حد الغيرة بتجننه أكتر..حد مبيعرفش ينام والتانى زعلان سواء منه او من غيره ,
الطرف التانى كل حاجة اقسمها على اتنين ومعاك تلاته واربعة وانت طالع..عادي جدا يفضل ميعرفش عنك حاجة بالاسبوع عشان حصل بينكوا شد بغض النظرمين الغلطان..عادي جدا يكون عارف ان تصرف معين بيزعلك ويحز فنفسيتك جدا ومع ذلك يعمله مرة واتنين وعشرة لانه عارف انك هتسامح..حد لو غار عليك بيبقى عشان انت مطلع عينه وواقفله ع الواحدة فبيوريك شوية م اللى بتعمله فيه مش أكتر..
انت أي طرف فيهم؟ وتحب تكون أي طرف فيهم؟

لو انت من الناس اللى بترضى مزاجها وحياتها تبقى تحت أمر حد تانى يبقى نصيحة متكملش البوست دا

أما لو كنت شاري أو شارية دماغك..بتخافى أو بتخاف على نفسك, يبقى بدل ماتوجع دماغك بانك تتقي وماتتقيش..متحبش م الاول احسن



ليه العلاقة المريضة المتطفلة دى م الاول؟! ليه حد يكون عايش ع التانى وكمان بيبقى حاسس ناحيته بذنب لانه مش عارف يرضيه ويرضى توقعاته "الاوفر" بالنسبه له!

متحبش احسن

اه والله! تخيل علاقة احترام وتقدير تدوم العمر..ولا حب ممكن تصحى الصبح متلاقيهوش؟ غير الشخرمة والمرمطة اللى بتشوفها خلاله؟!

ازاى بقى متحبش؟ ودى حاجة مش بارادتنا وبتاع..الكلام دا مش حقيقي

شوف يا سيدي ..مراحل الحب لازم تكون عارفها عشان تقدر تلحق نفسك فأول ولا تانى مرحلة بالكتير وتفرمل
وتلف وترجع تانى قبل ماتقع الفاس ف الراس

أول مرحلة بتلاحظ على نفسك انك أصبت بعمي جزئي..مش شايف من البنى ادم اللى قلبك نشن عليه غير كل حاجة حلوة..مفيهوش غلطة! ودا طبعا مستحيل يكون حقيقي لان الكمال لله سبحانه وتعالى زى ماحنا عارفين.

ف المرحلة دى لازم تخللي بالك وتركز مع نفسك وتفرمل كدا وتصللى ع النبي..لازم تحاول تشوف عيوب البنى ادم اللى ادامك دا كويس جدا ..بص اتصرف طلع عيوبه بأي طريقة حتى لو هتخترع:))

المرحلة اللى بعدها..
رجعت فكلامي مش هكمل المراحل..ماصل أول مرحلة دى هى أخطر مرحلة..لو عدت عليك هتتصدم كتير جدا على ماتستوعب انك بتحب بنى ادم طبيعي مش ملاك! هتتصدم كتير..

كله يخللى باله من نفسه بقى

سلام

في حاجة غلط

كنت بحاول احل اسئلة لاختبار تحليل شخصية..وخير اللهم اجعله خير حسيت انى عايزة استعين بصديق
انا معرفش حاجات كتير جدا عن نفسي
انا حتى لسه من خمس دقاق عرفت عنى انى جبانة
مع انى طول عمري قوية ومعروف عنى جرأتي وشجاعتى هع..يمكن اتغيرت مؤخرا..
مكنتش بعرف انام وحد زعلان منى ومتخاصمين وخصوصا لما الحد دا يكون بيهمنى..
بس لما الحد داهون ينام عادى؟
أكيد مع الوقت هتعود انا كمان..وبقيت انام كويس جدا..
كنت بخاف ع اللى بحبه جدا من حرقة الدم
وكانت حاجة مستحيلة بالنسبة لى اعمل حاجة وانا عارفة انها ممكن تزعله أو تنرفزه..
-حاجة منطقية تكون كدا مع الناس اللى بتحبهم وتخاف عليهم على فكرة:))-
بس لما تلاقى اللى بتحبه واللى المفروض بيحبك بيتبع الأسلوب دا كتير أول ماحاجة تضايقه منك؟
أكيد مع الوقت بقيت أقدر أعمل كدا انا كمان..
بس عارفين
الطبع بيغلب التطبع
مش عارفة هقدر استمر ف الأسلوب دا ولا مش هقدر..
طب عارفين كمان انى اعرف ناس بتستخسر تعمل حاجة حلوة مع حد بتحبه لمجرد انها اتعودت وجوده؟
ناس عندها حاجات حلوة كتير..بس شايلاها للناس اللى متعرفهمش كويس
الناس دى بتفكرنى بالست اللى عايزة تكسب حماتها..فتعاملها معاملة لوز قوي وايدك ابوسها يا ماما ولا لا عنك المقشة يا ست الحبايب!
وهى متعرفش حاجة عن أمها الحقيقية اللى نسياها ف البيت..!
ناس محتاجة اعادة توجيه لكل تصرفاتها
تخللى كدا قلة الذوق مع الناس قليلة الذوق..وقلة الاحترام مع اللى مش محترمين..تخللى اهانة الكرامة للناس اللى تستاهلها او معندهاش منها اساسن..وتخللى كل حاجة حلوة جواها للناس اللى بيحبوهم!
فى حاجة غلط !..
بس الغلط  الكبير..انك تعتبر الناس دى بتحبك فعلا:)

بسمة وصدمة الطفولة

مش عارفة انا زهقت من مصر
ولا زهقت من المصريين
ولا زهقت من نفسي..فقولت اروح اعمل منى واحدة جديدة
بتتعرف على حاجات جديدة جواها
وناس جديدة
وبلد جديد
وشغل جديد..
كنت عنيفة جدا وعدوانية وانا فابتدائي..كنت بحب بنتين اصحابى توءام جدا..كانوا شكلهم حلو وملفتين لنظر اى حد..كان لو حد رخم عليهم ..كنت بروح اضربه, فطبعا شلفطلى تلت تربع المدرسة ومكانش حد بيستلطفنى ولا انا كان فارق معايا حد غيرهم
واذ فجأة اكتشف انهم ولا انا فارقة معاهم خالص..ههههههه كان أول جرح فحياتى دا..بس اكتشفته على نهاية ابتدائي تقريبا

وساعتها جاتلى نفس الحالة اللى انا فيها دى دلوقتى
قولت انى لازم ابتدى من جديد
وانسى كل اللى فات
تعمدت انى ادخل فاعدادى فصل محدش فيه يعرفنى خالص
بقيت اجتماعية ومرة واحدة كدا بقيت لطيفة وسو كيوت ..مش هنسى يوم الانتخابات بتاعة رائد الفصل والمقررين وانى خدت أعلى الأصوات بلا منافس..بس انا فضلت اكون مقررة بس ولا اكتفيت بالأمين المساعد..مبحبش احط نفسي بمزاجى فمسئولية.

ولما روحت ثانوي زادت شعبيتى جدا..لا وشكلى احلو كمان, واصحابى بتوع ابتدائى كانوا هما اللى بيحاولوا يرجعوا يصاحبونى..بس الغريبة انى حتى بعد ماكبرت ونضجت كدا..كنت لسه فاكرالهم كويس الصدمة اللى صدمونى بيها فعز طفولتى هههههه خدت بتارى منهم , وارتاحت!

حاسة بفشل حاليا..وقرفانة جدا من كل حاجة هنا..
كل حاجة..
وزهقت جدا, وعايزة اجدد كل حياتى حتى لو كنت هبتديها تانى م الصفر
انا حتى فكرت اغير الكاريير من جذوره..اه اصلى زهقت م الصحافة
عايزة اشتغل رائدة فضاء او دكتورة بيطرية
أحيه دانا كدا هضطر اعيد من ثانوي:S
هسافر
بس خايفة لاحب حياتى الجديدة ومرجعش
اصلى عمرى مافكرت ارجع لبسمة بتاعة ابتدائى تانى.

للسيدات والرجال "اللى بتفهم" فقط!

هو اللى قاللى اكتبي والله هو اللى قال, ووالله لانا كاتبة اللى نفسي من زمان اكتبه وساكته
بصوا بقا يا برنس منك ليها..انا اه اتنين وعشرين سنة بس شاغلنى جدا حوار سن اليأس دا..مش هو فحد ذاته اللى شاغلنى لااا بالعكس..ابسلوتلى! كل اللى قالقنى جهل البنى ادمين بخصوص الموضوع دا
طبعا انتوا عارفين ان الستات مزاجهم متقلب جدا معظم الوقت..بسبب التغيرات الفسيولوجية الكتيرة جدا اللى بتحصلها طول عمرها من أول المحيض لحد نهاية عمرها مرورا بتغيير الهرمونات المصاحب للحمل والولادة والرضاعة واكتئاب ما بعد الولادة, اقل حاجة ممكن تبرر سوء مزاجها فى الاوقات دى انى اقول معلومة زى ان بيبقى فى خلايا مية بتتواجد بكثرة وبتضغط على المخ فبيخلي الست عصبية جدا وأميل للاكتئاب
على فكرة..عملوا دراسة بخصوص الموضوع دا واكتشفوا ان معظم جرايم القتل والانتحار اللى الستات بتعملها..بتعملها فى الوقت دا
كنت فى الأول متأزمة نفسية جدا ان ربنا بيمنع الستات من الصلاة او يلمسوا المصحف أثناء المحيض..كنت بفهم دا على ان الستات ممنوعين من الوقوف ادام ربنا بسبب نجاستهم وقتها..وكنت بقول لنفسي لا اله الا الله! طب مانت ياربى اللى خالق الموضوع دا هو كان بمزاجنا!!!!
طلعت غلطانة جدا..ربنا أعلم العالمين بكمية الضغط النفسي اللى بتبقى فيه الستات وقتها..عشان كدا شال من عليها حمل الصلاة :)
نرجع لمرجوعنا..سن اليأس, الحالة -المؤقتة-المنيلة بستين نيلة اللى بتصاحب وقت المحيض من كل شهر, بتكون فسن اليأس دااائمة..يعنى الاكتئاب والضغط العصبي واحساس ان الدنيا سواااد دا..بيبقى معاها لحد ماتقابل وجه كريم.
بالاضافة الى انها فى الوقت دا بيبدأ جسمها فمرحلة الهدم بالصلاة ع النبى..الجسم بيبتدى يستنزف مخزون الكالسيوم اللى عندها  (يعنى وجع عضم) وقلة نشاط, يعنى قلة انجاز..بالاضافة الى انها اصلا عندها استعداد جدا للاكتئاب
وهنا بقا الستات الحلوين اللى قرروا ميشتغلوش ويعيشوا عشان اولادهم وابوهم..الاولاد هيكونوا كبروا الحمد لله ومبقاش حد فاضيلها, وانتوا عارفين الرجالة بعد الاربعين ولا الخمسين:))..يعنى اللى كانت عايشة عشانه بخ..بالاضافة الى يقينها بانها خلاص كدا مستحيل هتخلف تانى بتترجمه على انها مبقاش لها عازة..الحياة بتسود.. وكفاية انا كمان احكى فسوادها دلوقتى
بصى يابنت الحلال..مينفعش تضحى بانك تشتغلى ابدا, اهو ع الاقل تلاقيلك حاجة فى الوقت دا تحسسك ان لسه فى حاجة بتعمليها فحياتك, والرياضة بتساعد جدا انها تحسن مزاجك وقتها, حاولى تفرفشى وتدندشى نفسك كدا ومتستنيش السعادة من حد..عشان غالبا محدش هيبقى فاضيلك:))..الا لو كلامى دا قراه رجالة بتفهم..وقدمت لزوجاتها الدعم والحب اللى هتكون فى أشد الحاجة اليه وقتها.
وعلى طول والله!:))

فوتتكم بعافية

بسمة بنت بهاء اتألشت م الشغل يا رجالة !

صللوا بينا ع النبى
أولا وحشتونى جدا جدا جدا
لاقتنى فضيتلكوا بقا ولسه مرفودة طازة م الشغل امبارح قولت اجى انقلكوا خبراتى اللى جمعتها طول الفترة اللى غيبت فيها عنكوا
مكنتش اعرف ان خبر الاستغناء عن خدماتى دا هيفرحنى كدا
وربنا الراجل بقا يقول الكلمتين دول بمرارة وانا بسمعهم كانه بيقوللى انتى خدتى اجازة نص السنة
كان نفسي اعمل حاجات كتير جدا بس أكل العيش كان لاهينى
تخيلوا مكنتش فاضية حتى اقعد مع نفسى افكرها انا كنت عايشة ليه ولا عايزة ايه م الدنيا أساسا
انا مبحبش الشغل
ومبحبش يبقى فى مدير عامل زى لامؤاخذة بوز الإخص كل يوم اتصبح بوشه ولا على تليفون منه يكلفنى بحاجة جديدة وينتقد فى الشغل بتاع اليوم اللى قبله
ايه اللى هيحصل يعنى لو كان المدير انسان طبيعي
كل مكان اروح اشتغل فيه بيبقى عامل زى الخرابة اللى لازم يطلعلنا منها عفريت
امتى بقا اكون انا العفريت بتاع الخرابة اللى شغالة فيها!
يحزننى انى بفكر بعد كل دا اسيب البلد واهج على برا
ابتديت اتعب من كتر التنقلات من موقع لجورنال والفلوس لا تذكر انا اللى تقريبا بصرف عليهم بالصلاة ع النبى
موضوع ان الصحافة رسالة ولا مش مهم الفلوس والكلام دا واحدة واحدة ابتديت ادرك مدى رومانسيته وبعده عن الواقع
الواحد بعد مابيتخرج بيتغير وبيبقى عنده دم مرة واحدة كدا
ومرة واحدة برضه بيبقى عايز ع الأقل يصرف على نفسه
الله يلعن أبوك يا مبارك ياللى خلتنا نفكر فى السفر
واحب اؤكدلكم فى النهاية ان احساس المرفود احساس جامد جدا على عكس ما إعلامنا المضلل بيصورلنا:))
المشكلة بس هتروح تقول الخبر لأهلك ازاى:डी
دمتم شغالين:)