عالم فاضية!

امبارح..كنت بدعى ان النت يرجع تانى عشان كان فاصل..ويارييييته مارجع
اول ما رجع فرحت قوى وفتحت الميل بتاعى,. اول مافتحته ابتدت واحدة صحبتى بحبها جدا تطلب منى ميل من عندى وبتسالنى عندى ميل غير اللى بكلمها عليه ولا لا
طب ليه تقوللى لازم ابعت رسالة ضرورى والميل بتاعى مش راضى يبعت اكيد فى حاجة غلط
بتلح بطريقه غريبة انا متعودتش انها تطلب منى حاجة اصلا فقولت هى مننا وعلينا وادتلها ايميل بالباس ورد
لاقتها بتقول لا مش راضى يفتح ممكن تدينى ايميلك دا؟ بالله عليكى حتى لو مفيش ثقه انا هديكى الباس ورد بتاعى لحد ماخلص!
قولتلها لا يابنتى طب خدى الميل دا واديتها ميل تانى غير الاساسى اللى كنت بكلمها عليه برضه
برضه تقوللى اقسم باللــــــــــه ماراضى يفتح!
خرجت من ميلى عشان اجرب الميلات اللى بتحلف انها مابتفتحش دى فتحوا معايا !
برضه مادتش خوانه وفتحت ميلى تانى واختنا عماله تتحايل وتتشنج لما اقولها طب ثوانى وتقولى هتدينى ايميلك ولا لا! كان زمانى بعت الرساله..طب اوكى ميرسى اوى!
انا قولت لنفسى دى لسه عامله معايا موقف جدعنه من يومين ومش عايزه ازعلها منى ..اكيد هى مش هتسرقنى انا عارفاها كويس!
وزى ال...ادتهولها!
بعدها لاقتها بعتالى دعوة فيديو! بقولها ادينى امارة انك انتى تقوللى امارة! طب خلاص انا هنا لما تتاكدى ان انا ابقى كلمينى!ساعتها دخلت كلمت واحد زميلنا احنا الاتنين بقول له هى ايميلها اتسرق امتى يقوللى من زمان! طب انا كدا اتسرقت يقوللى مش لوحدك اللى حصل معاكى كدا..بنات كتير غيرك انتى مش اول واحدة! وبعدها الميل فصل عشان فتح من مكان تانى ودى كانت اخر لحظة تجمعنى بايميلى..
طبعا انا ساعتها اتاكدت ..بس مش ان هى هى! لا ان انا اتنصب عليا نصبايه حلوة اوى
كدا 3 ايميلات وفيس بوكين يااااصلاااااة النـــــــــبى!
مابقاش حيلتى غير الياهو ولو كانت طولت معايا شويه كنت هاديهولها!
الغريبه ان دى اول مرة فحياتى ادى الباس ورد بتاعى لحد! دى امى بنفسها كانت بتتصل بيا مخصوص عشان تعرف الباس ورد للاب بتاعى عشان عمى محتاج يكلم اولاده المسافرين على الانترنت كنت اقولها بكل برود لا! واروح من الجامعه افتحهولها وارجع تانى! المهم ماحدش يعرف الباس ورد بتاعى!
ماقولكوش بقه الناس فرحت فيا قد ايه وخصوصا كل اللى كانوا هايموتوا ويعرفوا الباس ورد بتاعى وانا مرضاش!
انا! انا يحصل معايا كدا! وبمزاااجى اديلها كل الايميلات دى!انا!
انا بس عايزة افهم ليه؟ هما الناس دى بتستفاد ايه لما تعمل كدا! هو يعنى خلاص من صعوبة خطوات الميل النايس بقت تسرقه!طب حتى دى متعرفنيش! عايزة الميل بتاعى تعمل بيه ايه!
هو الناس بقت عايشة وكل هدفها فى الحياة ..هو الرخامة!

وعلى ايه كل دا؟!...الله الغنى!

علشان اقدر افهم الناس اكتر..عشان مايتضحكش عليا..عشان يكون عندى خبرة واقدر اختار صح
كل دى ردود بسمعها من بنات عاشوا حياتهم كلها فى قصص حب!! قصص ها؟ مش قصة ولا اتنين!
اى حد يدق الباب اهلا وسهلا بيه حتى لو مكنش فى اعجاب! لمجرد التجربة..
تفتكروا التجربة دى بتعدى بالساهل؟
الخبرة دى اللى عايزين يكونوها وعلى اساسها بيدخلوا نفسهم فعلاقات زى دى..تستاهل!؟
يعنى هاتفيد بايه الخبرة لما مايكونش باقى مكان فى القلب لحد جديد!ممكن يكون الحد دا هو احق منهم كلهم بمشاعرها دى كلها اللى استنزفتها عشان تكون خبرة! ساعتها التجارب والخبرة الواسعة دى هيكون لازمتها ايه؟؟!!
تفتكروا عمرو دياب لما قال "واهو بكره نقول كانت ذكرى وعيشنالنا يومين"..كان بيقولها على سبيل انه بيصبر نفسه ولا فعلا ممكن حد حب بجد وكان كل امله فى حياته انه يعيش مع انسان معين..يقول كلمة زى دى حتى لو الزمن نساه؟
اللى ممكن يقول الكلمة دى الشباب..لان بيبقى هدفهم فى الاول وفى الاخر هو انهم يعيشولهم يومين..واهى ياتيجى يا متجيش
عندهم قدرة عجيبة فانهم يعيشوا اللى هما عايزين يعيشوه بس!وبكدا بيبقى طبيعى جدا بعد الفشل المتوقع يقول اهى كانت ذكرى وعيشنالنا يومين!
البنات بقه..-الحق يتقال-..اسااااتذة فى النكــــــــــــــــد!ومش على اللى حواليهم لالالا..دا على نفسهم!
البنات مختلفين عن الشباب فى موضوع انهم الحب =جواااز ..فطبيعى الفشل المتوقع بيبقى جرح كبيير وامال اتحطمت بقه وحاجات كدا ممكن تمحى اى يومين حلوين اتعاشوا من الذاكرة!

محدش يقدر ينكر ان اول يومين فى الحب دايمااا بيكونوا مافيش اجمل من كدا
بس الايام اللى بعدهم بتيجى كأنها عايزه تعوض! عايزة تقوللك فووووق كفايه عليك كدا!
البنات بقه يقعدوا يندبوا على احلامهم اللى اتهدت ادامهم كلها! بعد ماتخيلوا مستقبلهم مع حد معين ورتبوا كل احلامهم عليه..كل دا..ذهب مع الريح!
ساعتها الايام الغبراء دى بتمحى بكل مهااارة-تحسد عليها الحقيقة- كل لحظة حلوة اتعاشت فى اليومين اللى قبلهم!
الموضوع بيبقى صعب ساعتها-على البنات اكتر-يكون ببساطة واهو بكره نقول كانت ذكرى وعيشنالنا يومين..
..بيبقى ساعتها جرح
..ممكن ياخدله سنين
عشان يطيب
ممكن فى السنين دى
نضيع اللى يستحق المشاعر اللى اترمت فى الارض دى لمجرد التجربة! ولا عشان خبرة!
وعلى ايه كل دا
الله الغنى!!!