الحج جوجل لو حد عايزه فحاجة

الأحد، مايو 05، 2013

ألا يكفيكي؟!



ألا يكفيكي ؟

ألا يكفيكي ان احميكى؟ اظل ورائك وجانبك اصاحبك واذكرك دائما؟

ألا يكفيكي؟

ألا يكفيكي ان اسامحك حين تنسين؟

وتغوصى فى مغامرة عشق جديد؟

تخرجين منه محطمة واضعف من قبل

فأقويكي؟

ألا يكفيكي؟

ترحلين وتختفين دون سابق انذار

تتركين الدار

وانا وحدي انتظرك

لتعودين وتقولين عذرا

كان لابد ان اأخذ بالثار!

هذا الرجل هجرنى وخدعنى

ولست انا من أُترك بالاختيار!

ألا يكفيكي رجلا ذاب فيكي عشقا

نسي نفسه ونسى ما كان وماكان يريد أن يكون!

من أجل ان تكونى انتى!

ألا يكفيكي!

ألن تلتفنى لي يوما؟

أيجب ان أحبك بطريقتهم حتى تفهمين!

حتى تلتفتين الي وتنظرين!

سأرحل

ربما ان رحلت تفهمين!

السبت، ديسمبر 08، 2012

اتقي شر من أحببيت

عارف ايه اللى هيحصل لو حبيت؟

دايما هيكون فى بينكوا حد بيحب التاني أكتر..حد الغيرة بتجننه أكتر..حد مبيعرفش ينام والتانى زعلان سواء منه او من غيره ,
الطرف التانى كل حاجة اقسمها على اتنين ومعاك تلاته واربعة وانت طالع..عادي جدا يفضل ميعرفش عنك حاجة بالاسبوع عشان حصل بينكوا شد بغض النظرمين الغلطان..عادي جدا يكون عارف ان تصرف معين بيزعلك ويحز فنفسيتك جدا ومع ذلك يعمله مرة واتنين وعشرة لانه عارف انك هتسامح..حد لو غار عليك بيبقى عشان انت مطلع عينه وواقفله ع الواحدة فبيوريك شوية م اللى بتعمله فيه مش أكتر..
انت أي طرف فيهم؟ وتحب تكون أي طرف فيهم؟

لو انت من الناس اللى بترضى مزاجها وحياتها تبقى تحت أمر حد تانى يبقى نصيحة متكملش البوست دا

أما لو كنت شاري أو شارية دماغك..بتخافى أو بتخاف على نفسك, يبقى بدل ماتوجع دماغك بانك تتقي وماتتقيش..متحبش م الاول احسن



ليه العلاقة المريضة المتطفلة دى م الاول؟! ليه حد يكون عايش ع التانى وكمان بيبقى حاسس ناحيته بذنب لانه مش عارف يرضيه ويرضى توقعاته "الاوفر" بالنسبه له!

متحبش احسن

اه والله! تخيل علاقة احترام وتقدير تدوم العمر..ولا حب ممكن تصحى الصبح متلاقيهوش؟ غير الشخرمة والمرمطة اللى بتشوفها خلاله؟!

ازاى بقى متحبش؟ ودى حاجة مش بارادتنا وبتاع..الكلام دا مش حقيقي


شوف يا سيدي ..مراحل الحب لازم تكون عارفها عشان تقدر تلحق نفسك فأول ولا تانى مرحلة بالكتير وتفرمل
وتلف وترجع تانى قبل ماتقع الفاس ف الراس

أول مرحلة بتلاحظ على نفسك انك أصبت بعمي جزئي..مش شايف من البنى ادم اللى قلبك نشن عليه غير كل حاجة حلوة..مفيهوش غلطة! ودا طبعا مستحيل يكون حقيقي لان الكمال لله سبحانه وتعالى زى ماحنا عارفين.

ف المرحلة دى لازم تخللي بالك وتركز مع نفسك وتفرمل كدا وتصللى ع النبي..لازم تحاول تشوف عيوب البنى ادم اللى ادامك دا كويس جدا ..بص اتصرف طلع عيوبه بأي طريقة حتى لو هتخترع:))

المرحلة اللى بعدها..
رجعت فكلامي مش هكمل المراحل..ماصل أول مرحلة دى هى أخطر مرحلة..لو عدت عليك هتتصدم كتير جدا على ماتستوعب انك بتحب بنى ادم طبيعي مش ملاك! هتتصدم كتير..

كله يخللى باله من نفسه بقى

سلام

الأربعاء، أغسطس 15، 2012

في حاجة غلط

كنت بحاول احل اسئلة لاختبار تحليل شخصية..وخير اللهم اجعله خير حسيت انى عايزة استعين بصديق
انا معرفش حاجات كتير جدا عن نفسي
انا حتى لسه من خمس دقاق عرفت عنى انى جبانة
مع انى طول عمري قوية ومعروف عنى جرأتي وشجاعتى هع..يمكن اتغيرت مؤخرا..
مكنتش بعرف انام وحد زعلان منى ومتخاصمين وخصوصا لما الحد دا يكون بيهمنى..
بس لما الحد داهون ينام عادى؟
أكيد مع الوقت هتعود انا كمان..وبقيت انام كويس جدا..
كنت بخاف ع اللى بحبه جدا من حرقة الدم
وكانت حاجة مستحيلة بالنسبة لى اعمل حاجة وانا عارفة انها ممكن تزعله أو تنرفزه..
-حاجة منطقية تكون كدا مع الناس اللى بتحبهم وتخاف عليهم على فكرة:))-
بس لما تلاقى اللى بتحبه واللى المفروض بيحبك بيتبع الأسلوب دا كتير أول ماحاجة تضايقه منك؟
أكيد مع الوقت بقيت أقدر أعمل كدا انا كمان..
بس عارفين
الطبع بيغلب التطبع
مش عارفة هقدر استمر ف الأسلوب دا ولا مش هقدر..
طب عارفين كمان انى اعرف ناس بتستخسر تعمل حاجة حلوة مع حد بتحبه لمجرد انها اتعودت وجوده؟
ناس عندها حاجات حلوة كتير..بس شايلاها للناس اللى متعرفهمش كويس
الناس دى بتفكرنى بالست اللى عايزة تكسب حماتها..فتعاملها معاملة لوز قوي وايدك ابوسها يا ماما ولا لا عنك المقشة يا ست الحبايب!
وهى متعرفش حاجة عن أمها الحقيقية اللى نسياها ف البيت..!
ناس محتاجة اعادة توجيه لكل تصرفاتها
تخللى كدا قلة الذوق مع الناس قليلة الذوق..وقلة الاحترام مع اللى مش محترمين..تخللى اهانة الكرامة للناس اللى تستاهلها او معندهاش منها اساسن..وتخللى كل حاجة حلوة جواها للناس اللى بيحبوهم!
فى حاجة غلط !..
بس الغلط  الكبير..انك تعتبر الناس دى بتحبك فعلا:)

الأحد، أغسطس 12، 2012

بسمة وصدمة الطفولة

مش عارفة انا زهقت من مصر
ولا زهقت من المصريين
ولا زهقت من نفسي..فقولت اروح اعمل منى واحدة جديدة
بتتعرف على حاجات جديدة جواها
وناس جديدة
وبلد جديد
وشغل جديد..
كنت عنيفة جدا وعدوانية وانا فابتدائي..كنت بحب بنتين اصحابى توءام جدا..كانوا شكلهم حلو وملفتين لنظر اى حد..كان لو حد رخم عليهم ..كنت بروح اضربه, فطبعا شلفطلى تلت تربع المدرسة ومكانش حد بيستلطفنى ولا انا كان فارق معايا حد غيرهم
واذ فجأة اكتشف انهم ولا انا فارقة معاهم خالص..ههههههه كان أول جرح فحياتى دا..بس اكتشفته على نهاية ابتدائي تقريبا

وساعتها جاتلى نفس الحالة اللى انا فيها دى دلوقتى
قولت انى لازم ابتدى من جديد
وانسى كل اللى فات
تعمدت انى ادخل فاعدادى فصل محدش فيه يعرفنى خالص
بقيت اجتماعية ومرة واحدة كدا بقيت لطيفة وسو كيوت ..مش هنسى يوم الانتخابات بتاعة رائد الفصل والمقررين وانى خدت أعلى الأصوات بلا منافس..بس انا فضلت اكون مقررة بس ولا اكتفيت بالأمين المساعد..مبحبش احط نفسي بمزاجى فمسئولية.

ولما روحت ثانوي زادت شعبيتى جدا..لا وشكلى احلو كمان, واصحابى بتوع ابتدائى كانوا هما اللى بيحاولوا يرجعوا يصاحبونى..بس الغريبة انى حتى بعد ماكبرت ونضجت كدا..كنت لسه فاكرالهم كويس الصدمة اللى صدمونى بيها فعز طفولتى هههههه خدت بتارى منهم , وارتاحت!

حاسة بفشل حاليا..وقرفانة جدا من كل حاجة هنا..
كل حاجة..
وزهقت جدا, وعايزة اجدد كل حياتى حتى لو كنت هبتديها تانى م الصفر
انا حتى فكرت اغير الكاريير من جذوره..اه اصلى زهقت م الصحافة
عايزة اشتغل رائدة فضاء او دكتورة بيطرية
أحيه دانا كدا هضطر اعيد من ثانوي:S
هسافر
بس خايفة لاحب حياتى الجديدة ومرجعش
اصلى عمرى مافكرت ارجع لبسمة بتاعة ابتدائى تانى.

الثلاثاء، أغسطس 07، 2012

للسيدات والرجال "اللى بتفهم" فقط!

هو اللى قاللى اكتبي والله هو اللى قال, ووالله لانا كاتبة اللى نفسي من زمان اكتبه وساكته
بصوا بقا يا برنس منك ليها..انا اه اتنين وعشرين سنة بس شاغلنى جدا حوار سن اليأس دا..مش هو فحد ذاته اللى شاغلنى لااا بالعكس..ابسلوتلى! كل اللى قالقنى جهل البنى ادمين بخصوص الموضوع دا
طبعا انتوا عارفين ان الستات مزاجهم متقلب جدا معظم الوقت..بسبب التغيرات الفسيولوجية الكتيرة جدا اللى بتحصلها طول عمرها من أول المحيض لحد نهاية عمرها مرورا بتغيير الهرمونات المصاحب للحمل والولادة والرضاعة واكتئاب ما بعد الولادة, اقل حاجة ممكن تبرر سوء مزاجها فى الاوقات دى انى اقول معلومة زى ان بيبقى فى خلايا مية بتتواجد بكثرة وبتضغط على المخ فبيخلي الست عصبية جدا وأميل للاكتئاب
على فكرة..عملوا دراسة بخصوص الموضوع دا واكتشفوا ان معظم جرايم القتل والانتحار اللى الستات بتعملها..بتعملها فى الوقت دا
كنت فى الأول متأزمة نفسية جدا ان ربنا بيمنع الستات من الصلاة او يلمسوا المصحف أثناء المحيض..كنت بفهم دا على ان الستات ممنوعين من الوقوف ادام ربنا بسبب نجاستهم وقتها..وكنت بقول لنفسي لا اله الا الله! طب مانت ياربى اللى خالق الموضوع دا هو كان بمزاجنا!!!!
طلعت غلطانة جدا..ربنا أعلم العالمين بكمية الضغط النفسي اللى بتبقى فيه الستات وقتها..عشان كدا شال من عليها حمل الصلاة :)
نرجع لمرجوعنا..سن اليأس, الحالة -المؤقتة-المنيلة بستين نيلة اللى بتصاحب وقت المحيض من كل شهر, بتكون فسن اليأس دااائمة..يعنى الاكتئاب والضغط العصبي واحساس ان الدنيا سواااد دا..بيبقى معاها لحد ماتقابل وجه كريم.
بالاضافة الى انها فى الوقت دا بيبدأ جسمها فمرحلة الهدم بالصلاة ع النبى..الجسم بيبتدى يستنزف مخزون الكالسيوم اللى عندها  (يعنى وجع عضم) وقلة نشاط, يعنى قلة انجاز..بالاضافة الى انها اصلا عندها استعداد جدا للاكتئاب
وهنا بقا الستات الحلوين اللى قرروا ميشتغلوش ويعيشوا عشان اولادهم وابوهم..الاولاد هيكونوا كبروا الحمد لله ومبقاش حد فاضيلها, وانتوا عارفين الرجالة بعد الاربعين ولا الخمسين:))..يعنى اللى كانت عايشة عشانه بخ..بالاضافة الى يقينها بانها خلاص كدا مستحيل هتخلف تانى بتترجمه على انها مبقاش لها عازة..الحياة بتسود.. وكفاية انا كمان احكى فسوادها دلوقتى
بصى يابنت الحلال..مينفعش تضحى بانك تشتغلى ابدا, اهو ع الاقل تلاقيلك حاجة فى الوقت دا تحسسك ان لسه فى حاجة بتعمليها فحياتك, والرياضة بتساعد جدا انها تحسن مزاجك وقتها, حاولى تفرفشى وتدندشى نفسك كدا ومتستنيش السعادة من حد..عشان غالبا محدش هيبقى فاضيلك:))..الا لو كلامى دا قراه رجالة بتفهم..وقدمت لزوجاتها الدعم والحب اللى هتكون فى أشد الحاجة اليه وقتها.
وعلى طول والله!:))

فوتتكم بعافية


الأحد، يناير 29، 2012

بسمة بنت بهاء اتألشت م الشغل يا رجالة !

صللوا بينا ع النبى
أولا وحشتونى جدا جدا جدا
لاقتنى فضيتلكوا بقا ولسه مرفودة طازة م الشغل امبارح قولت اجى انقلكوا خبراتى اللى جمعتها طول الفترة اللى غيبت فيها عنكوا
مكنتش اعرف ان خبر الاستغناء عن خدماتى دا هيفرحنى كدا
وربنا الراجل بقا يقول الكلمتين دول بمرارة وانا بسمعهم كانه بيقوللى انتى خدتى اجازة نص السنة
كان نفسي اعمل حاجات كتير جدا بس أكل العيش كان لاهينى
تخيلوا مكنتش فاضية حتى اقعد مع نفسى افكرها انا كنت عايشة ليه ولا عايزة ايه م الدنيا أساسا
انا مبحبش الشغل
ومبحبش يبقى فى مدير عامل زى لامؤاخذة بوز الإخص كل يوم اتصبح بوشه ولا على تليفون منه يكلفنى بحاجة جديدة وينتقد فى الشغل بتاع اليوم اللى قبله
ايه اللى هيحصل يعنى لو كان المدير انسان طبيعي
كل مكان اروح اشتغل فيه بيبقى عامل زى الخرابة اللى لازم يطلعلنا منها عفريت
امتى بقا اكون انا العفريت بتاع الخرابة اللى شغالة فيها!
يحزننى انى بفكر بعد كل دا اسيب البلد واهج على برا
ابتديت اتعب من كتر التنقلات من موقع لجورنال والفلوس لا تذكر انا اللى تقريبا بصرف عليهم بالصلاة ع النبى
موضوع ان الصحافة رسالة ولا مش مهم الفلوس والكلام دا واحدة واحدة ابتديت ادرك مدى رومانسيته وبعده عن الواقع
الواحد بعد مابيتخرج بيتغير وبيبقى عنده دم مرة واحدة كدا
ومرة واحدة برضه بيبقى عايز ع الأقل يصرف على نفسه
الله يلعن أبوك يا مبارك ياللى خلتنا نفكر فى السفر
واحب اؤكدلكم فى النهاية ان احساس المرفود احساس جامد جدا على عكس ما إعلامنا المضلل بيصورلنا:))
المشكلة بس هتروح تقول الخبر لأهلك ازاى:डी
دمتم شغالين:)



الخميس، أكتوبر 27، 2011

خخخخخ..بضحك معااااكى!!!

كنت كتبت فأواخر يونيو السنة اللى فاتت تحت عنوان"كلمتين وبس" وكانت الكلمة التانية تحديدا مختصرها نقد للراجل اللى ممكن يقول ويعمل كل تصرفات العشقانين الدايبانين من غير مايحدد موقفه بكلمة صريحة زى انه يجيب م الاخر(بحبك- معجب بيكى) واهو يبقى علًق البنية وبيقضى وقت لذيذ وفنفس الوقت موقفه سليم جدا ويقدر يخلع فأى وقت..هو كان قاللها بحبك ولا هتجوزك! هى اللى بتحب على نفسها..الموضوع اهو للى مشافوش او ناسيه

http://ghalasabghalasa.blogspot.com/2010/06/blog-post_26.html

اللى خلانى افتح ذات الموضوع تانى بقا ايييه؟ خيير اللهم اجعله خير, اكتشفت ان الرجالة-ربنا يجعل كلامنا خفيف عليهم-مبيبقوش فاهمين فعلا ان اللى بيعملوه دا استعباط بالصلاة ع النبى..مقتنعين تمام الإقتناع انهم مهما يعملوا..مهما يعملوا..مدام ماقالوش(بحبك ولا معجب بيكى) اذن هو فى السليم واللى ادامه هو اللى بيفهم غلط..طب هو ذنبه ايه بقا دلوقتى يعنى؟!

الموضوع طلع مش انهم وحشين وقاصدينها زى ماكنت فاكرة..ظلمناهم, لا هما مقتنعين ان كدا عداهم العيب وأزح فعلا!

طب خدى التقيلة بقا..حتى لو قاللك "عايز اتجوزك" ممكن ييجى بعدها يقوللك "خخخخخخخخخ..دانا كنت بضحك معاكى!" دا ايه الناس اللى مابتصدق دى؟!:D

وهما غالبا مبيكون دمهم خفيف الصراحة!

عملت تحقيق صغير كدا-من غير ماقصد والله-عن وجهة نظرهم فى الموضوع دا, ودا اللى خلانى اذبهل لما لاقيت رد كل راجل بيفيد اقتناعه التااااام انه فعلا معملش حاجة غلط وهى اللى بتحب على نفسها

لا وكمان فى ناس لو البنت طلعت حلوة ومبتحبش على نفسها واتخطبت لحد غيره بيقولوا عنها خاينة:D

اه خاينة ازاى تنكر اللى كان بينهم.. يخرب بيت التناقض والإزدواج!!!

ماعلينا دلوقتى..اللى عايزة اقوله م الاّخر..لو هما مش فاهمين ومش قد الكلام اللى بيقولوه او المعانى اللى بيوصلوها..خليكى انتى ناصحة واعملى حاجة م الاتنين..يا اما متصدقيش وتتعاملى مع الكلام على انه هذى وهزار..يا إما لو ماعندكيش مرارة تديه فوق دماغه..انتى مش ناقصة سهوكة غير هادفة ع الصبح:D

فوتك بعافية:)

الاثنين، سبتمبر 26، 2011

تحرر

تحرر من جسدك الان!
اسمح لروحك بان تنفصل عنه لأول مرة
اعطها حريتها لأول مرة,اتركها تهيم وتسبح فى ملكوت خالقها لأول مرة’دعها تكتشف وحدها دون الحاجة الى كتب الفلسقة ولا الحكم أو المواعظ ان فعلا الجسد ماهو الى مجرد غطاء لها وانها هى وحدها الأصل!

دعها تشعر كم ان الموت راحة, كم كانت حبيسة داخل جسدك..مقيدة
جسدك كان يؤلمها يعذبها
كان يشعرها بمدى ضيق الكون عليها رغم فساحته

اتعلم؟ اذا اخذت بنصيحتى تلك سترتاح من نفسك البشرية صاحبة نصيب الأسد فى أسباب تحرق قلبك ووجيعته

أعلم ان قلبك شعرت به يوما يقطر دما وماستطعت النطق او طلب المساعدة , أعلم أيضا كم مرة ندمت على حماقات ارتكبتها سواء فى حقك او فحق غيرك

أعلم بشأن محاولاتك المستميتة لتبرير تصرفاتك ولو أمام نفسك حتى ترتاح من تأنيب الضمير

كما علمت أيضا حلمك الأخير..حلمك الذى تجاهلت مدى صعوبة تحقيقة وسعيت وراء رغباتك المجنونة فى ان تصبح سعيدات مرتاحا,,أعلم بشأن كمية الطرق السهلة التى كانت أمامك لتختار بينها طريق تحقيق سعادتك

وعلمت اى طريق اخترت

الأصعب..

لن تشعر بخيبة أمل مجددا

فقط تحرر من جسدك..اخرج منه وانظر الى الكون بعينك الجديدة

وقتها فقط لن تفكر مائة مرة قبل اى تصرف تقوم به

قبل اى دفعة ادرينالين تفاجأ بها مندفعة فى عروقك عند رؤية او التحدث الى شخص ما

عند اى بارقة أمل جديدة..تظل تفكر فيما قد يحدث لك اذا خاب أملك من جديد ليمر الوقت دون ان تأخذ قرارك لتكتشف انك خسرت حتى خيبة الأمل! بسبب خوفك على نفسك

وروحك..

حررها !

الاثنين، أغسطس 15، 2011

فهل أخطأت؟

أدركت انى أعيش الاّن-قبلك- أكثر فترات حياتى بأسا وقسوة,فأردت ان أسجل حالتى تلك حتى أتذكر كلما غضبت منك أو شعرت بالملل او أردت لأى سبب ان اتركك ..كم كنت حنونا معى حين أخذت بيدى ولونت حياتى الخالية من أى مظهر حيوى بألوان ربيعك..
لم أعر اهتماما للحب يوما, ولم أدرك من قبل بأى فائدة خُلق مادامت لذته وحلاوته مؤقتة؟! بل أحيانا كنت أعتبره فراغا وأسخر ممن يشعرون به تارة,وتارة أخرى أشعر تجاههم بالعطف والشفقة! ماهذا الغباء الذى يقودهم لتسليم زمام أمرهم الى اّخر؟! اّخر ليس أكثر من كونه انسانا مثلك ولكنه يتحكم بحالتك المزاجية بالكامل وبإرادتك! يستطيع بكل سهولة ان يجعلك أسعد انسان فى العالم وبسهولة أكبر يستطيع ان يقودك الى التفكير فى الانتحار!

أسباب كثيرة جعلتنى أعيش حياتى –قبلك- دون حب..

نضجت قبل أوانى,كنت مدركة اثناء مراهقتى- أو ربما قبلها- انى موشكة على دخول مرحلة عمرية هى الاخطر على الاطلاق,وهى أساس اى تصرف قد يندم عليه الانسان يوما..
كنت أخاف الندم..فخوفت الاندفاع والاستجابة لعواطفى..فمرت تلك المرحلة بسلام..

ساورنى بعض القلق عندما أتممت الواحد وعشرين من عمرى وانى رسميا وبالأوراق قد تجاوزت هذة المرحلة دون ان أخطأ كأى انسان طبيعى اثناء مراهقته!

عندما دخلت الجامعة كنت مدركة أيضا ان علاقات الحب فيها عابرة وغير حقيقية و"تضييع وقت" ..خوفت من الوهم والجرح وضياع العمر فمرت تلك المرحلة بسلام ايضا..

شيئ اّخر كان يجعلنى أحاول عدم خوض مثل هذة التجارب,وهو "صدقى"..أردت ان تكون انت أول رجل يملك قلبى وحياتى وأردت ان أكون صادقة عندما أخبرك بهذا كى أفرحك..

ثم نبهتنى كرامتى الى حقيقة انك لم تنتظرنى يوما ولم تعطل تجربة او تسلية فى حياتك من أجلى,فلم لا اعيش حياتى مثلك؟!

وحين بطُلت حجتى تلك,وأصبحت حرة بموجب قرارى الاخير هذا فى أخذ قسط من الحياة..لم استطع ايضا!!

اعتقدت خطأً فى بداية الأمر انى قد تعودت على العيش وحيدة تحت مسمى "الحرية" وعلى حياة "الجًد" ثم تنبهت الى حقيقة انى اعلم جيدا انه لا أحد سيخاف على فقررت المحافظة على نفسى دون ان أعى هذا,

لم يكن من أجلك حبيبى ولكن من أجلى أنا.

أعيش حالة من التخبط..أشعر بالتناقض بين مدى احتياجى وشوقى لرؤياك وبين عدم رغبتى فى البحث عنك ..ربما تكون امامى الاّن ولا أشعر بوجودك ولا اعرفك, أخبرنى كيف سأتعرف اليك وانا لم اقابلك أو أسمع صوتك يوما؟! كيف سأميزك من بين كل هؤلاء وأعلم انك انت من انتظر ولم يعطنى أحد مواصفاتك مسبقا ولم تزورنى أنت حتى فى أحلامى؟ّ!

على كلٍ, حين أجدك فاعلم حبيبى
أن فتاتك خافت ان تعيش قبلك

فأحييها انت بكذبة ستصدقها

واخبرها بانه"لا داعى للخوف معك".

الجمعة، يوليو 08، 2011

أشوف شبحك بخير!"مقالى فى مجلة نتواصل اللى هى مشروع تخرجى" حصريا:D

معروف عن الحب الذى تبدأ قصته عن طريق الانترنت انه "فاشل" وعن الشباب المشهورين بجملة"ممكن نتعرف" انهم ممثلين كما هو معروف ايضا عن البنات التى تقبل ان "تتعرف" انهن بنات غير محترمات!

واذا حدثت المعجزة وطلع الشاب جاد والبنت محترمة وهنقرا فاتحة بعون الله يكون هناك اتفاقا بينهم ان سبب تعارفهم اى شيئ اّخر غير الانترنت-هذا ما سيقولونه امام الوالد-

اما اذا لم تحدث ستكون علاقة عابرة تبدا ب add" ,وتخلص بblock!

يبدو الموضوع فى غاية السهولة..اذا اردت ان تنهى علاقتك بشخص ما دون ان تضطر لان تواجه او تبرر عدم حاجتك له حينئذ ما عليك الا ب"ضغطة كيبورد" واحيانا تضطر لتحريك اصابعك مستخدما الفارة .

كثير يؤكدون انه لا يوجد ما يسمى بحب الانترنت..صعب ان يستوعب احد انك بتحب حد لم تسبق لك مقابلته وكل علاقتك به عبارة عن "ايموشنز" عبر الانترنت!

ولكن الغريب ان هناك من عاش على ذكرى حب الكترونى اكثر من سنتين وانت طالع! يكون وقتها هجر الحبيب عبارة عن انه "اون لاين" وماتكلمش! وعندما يسوق الدلال يكون هذا على شكل تأخير فى الرد على الرسائل!

وكله كوم وتصااارع دقات قلبك الذى يكاد يقفذ بين ضلوعك ليحتضن شاشة الكمبيوتر عندما يطل ايميله اسفل يمينها معلنا انه اصبح اون لاين ويمكنك التحدث معه الان!

الموضوع هنا عادة مايكون اصعب عند محاولتك بدء حياة طبيعية مع اّخر ..انك تعتقد انك هتلاقى حد كله ايجابيات مثل من قابلته الكترونيا هذا شيئ مستحيل..لان من لا ترى له عيبا هذا انسان..والكمال لله وحده سبحانه وتعالى! ولكن المشكلة ان اللقاء الالكترونى يستر افضل من الظلمة احيانا كثيرة! ويعطى فرصة لمن تتحدث معه باخفاء عيوبه واظهار مميزاته فقط!

ولا ننسى من موقعنا هذا ان نشييد بالقدرة التمثيلية البارعة لابناء ارض الواقع ايضا! الأمر الذى اثبت ان الانسان يمكنه التمثيل والظهور على غير حقيقته سواء كان يتعامل معك وجها لوجه او من خلف شاشات!

ولكن غزو الانترنت لحياتنا بهذا الشكل غير المتوقع كون لدينا مثل خبرة فى معرفة ما ان كنت تتحدث الى شخص كاذب ام صادق؟ هل هذا الوجه الاصفر الضاحك مبينا اسنانة الناصعة..من القلب فعلا ام فقط من الكيبورد؟! هل تتحدث الى شخص ذو شخصية مترددة؟ جبانة؟ متكبرة؟! ام العكس! الأمر وصل الى ان يكون "بروفايل" ع الفيس بوك يساعد بشكل كبير فى تحديد شخصية صاحبه وما ان كانت تتميز بالكاريزما ام انطوائية! بغض النظر طبعا عن ان صندوق بريدك هو المحدد الفعلى لشخصيتك..ومن يضطلع عليه يكون قد تعرف الى جوهرك ليس اليك شخصيا فقط! ربما اكثر من افراد اسرتك واصدقائك الواقعيين!!!

بعد ثورة 25 يناير المصرية ومعرفة والديك ان الانترنت وتحديدا الفيس بوك كان من اكثر الاشياء التى ساعدت على اتمامها..هل سيظل لدينا اباء وامهات يرفضون خطبة لمجرد ان التعارف كان عن طريق الانترنت؟! ام سيكون اختبار العريس عن طريق التحدث اليه عن طريق "اكاونت" مزيف عبر الفيس بوك والسؤال عنه عبر "الفريندز"؟

السبت، مايو 21، 2011

من نٍفسى

عارفين انا مبكتبش كتير ليه؟!
عشان معظم الوقت اللى ببقى هموت فعلا واكتب فيه ببقى مكتئبة ونكدية وانا فعلا مبحبش النكد
يعنى ان كان ولابد فيبقى مع نفسى
مش اجى هنا واخللى كل اللى حظه جابه هنا يتنكد معايا॥ملهاش لازمة
بس عايزة اقول لكم انى زهقت جدا م الماسك دا
زهقت من التمثيل وانى اعيش فدور الناقدة والناصحة واعملوا ومتعملوش
انا زهقت اعيش دور واحدة تانية خااااااااالص ملهاش اى علاقة بيا!
كل حاجة فحياتى اكتشفت انها مزيفة, انا نفسى مزيفة
ايوه مزيفة! واحدة تانية خالص غير اللى بتتعامل مع الناس!
مبحبش اكتب وانا مكتئبة لانى بكون ضعيفة جدا
وانا بكره الضعف
كرهى للضعف دا خلانى اعمل حاجات كتير
خلانى انسى ان ربنا نفسه بيقول ان الانسان ضعيف!
خلانى اكون قاسية على نفسى جدا ومرحمهاش لما اغلط حتى لو كانت غلطة هبلة وعادية يعنى
عذاب مستمر لان عمرى ماهبطل اغلط ومش عارفة ابطل اجلد فنفسى كل حتى ماقول كلمة مكانش ينفع تتقال
و انا لسانى دا مش هيجيبها لبر..
بكدب على نفسى كتير عشان أأكد لنفسى انى قوية ودا فعلا مش حقيقى
للاسف انا لحد دلوقتى وانا اهو كملت २१ سنة من كم يوم॥معرفش اكون لوحدى
بتبقى حالتى صعبة لما انا وصديقتى يحصل خلاف بينا مثلا على اساسه المفروض اكون لوحدى كم يوم لحد مايتحل الخلاف دا
للسبب دا انا بعدت عن انى احب
الفترة اللى فاتت دى كانت جافة جدا
بحاول افتكر عملت ايه امبارح مش عارفة
طب هاعمل ايه بكرة اصلا مش عايزة افكر
طب النهارده عامل ازاى॥ولاااااا يفرق
انا عارفة انى لو حبيت ممكن يحصل جديد واتغير॥بس تصدقوا بايه؟! انا كرهت الحب
لانى بكره الضعف
كنت داخلة الوسط المنيل على عينه الصحفى دا وانا فاكرة انى داخلة عالم الاحلام
بلا وكسة
كنت بتعامل مع اى صحفى فى الاول على انه واو حد محصلش
دلوقتى بتعامل معاهم على انهم ازبل خلق الله الى ان يثبت العكس
انا متضايقة انى وصلت للمرحلة دى
انك تكون مش قادر تثق فحد دى مش شطارة ॥دى حاجة تحزن وتخليك تحس انك لوحدك!
كمان موضوع انى كملت الواحد وعشرين سنة دا عامللى ربكة بصراحة
مش مستوعبة انى كبرت! انا كبرت كدا امتى؟! يعنى وانا صغيرة لما كنت بقول على فلان كبير اصل عنده عشرين سنة انا كنت غلطانة
اللى عندهم عشرين سنة مش كبار ولا حاجة
دانا حاسة انى كل مدى بصغر وبضعف اكتر!!!!!!!!!!!!!!!!!!!!!!!!!!!!!!!!!!
دانا لسه بحط حتة معجون صغيرة على فرشة السنان احسن ابلعه!
قفشت نفسى من اسبوع وانا سرحانة مع الدكتور بتاعى اللى كان جايب ابنه الصغير معاه المحاضرة
كان جايبله كيس صغير فيه حلويات وبيلعب معاه
استغربت جدا انى حنيت اوى للاحساس بتاع ابنه الصغير دا
عمرى ماحنيت للطفولة ودايما اقول عليها داهية لاترجعها ايام!
هو فى ايه!
ياريت اللى يدخل هنا يدعيلى لانى بمر بوقت مش ولابد
بس خلاص:))

الثلاثاء، أبريل 12، 2011

وياريتنى كلته!!!!

زى بالظبط اللى طول عمره على سجادة..وتشاء الاقدار ان اخرته تبقى فخمارة! النهارده كنت هموت -ماشى علينا حق-وفى التحرير-ياسلام حد يطول- بس اموت وانا مؤيدة؟! اموت والناس فاكرانى حزب وطنى؟! لا بقى وربنا مانا ميته:@

كل الموضوع ..انى حبيت اكل ايس كريم..وصديقتنا المؤيدة روخرة كانت"مخنوقة شوية" فحبت تغير جو ع البورصة اللى فوسط البلد..سبقتنا هى على التحرير وانا وصديقتى المؤيدة برضه خلصنا اللى ورانا فى الجامعة وحصلناها-

-الو يا اّية انتى فين احنا وصلنا؟

- استنونى عند الصينية انا بشترى ورق واقلام وجاية

- لا الصينية زحمة هنستناكى عند تمثال عمر مك..

- لاااا هى الصينية ..استنونى عند الصينية..انا جايالكوا ع الصينية!

- طيب متتأخريش

---

ناس كتير وزحمة ونظام تكتلات واحنا واقفين فى النص مستنين صديقتنا اللى مخنوقة شوية وجاية تغير جو..وانا مستنية نروح ناكل الايس كريم اللى من هنا ورايح عمرى ماهفكر اكله فحياتى..

جو ملبش فى التحرير وتحديدا فى الصينية..غير اللى كنا بنشوفه كل مرة كان فى حاجة مريبة مكهربة الجو

وهوب جه شاب منعرفهوش وقالنا ان المكان خطر وان فى بلطجية جاية كتير وباعتنهالنا وجايين من الناحية دى والناحية دى..تعالوا اقفوا معانا

لا احنا مستنين صاحبتنا بس لو فى حاجة هنصفرلك

قولوا صاحبتكوا فين واحنا نروح نجيبها مينفعش تبقى لوحدها دلوقتى

مكملش كلامه لاقينا كل الناس بتجرى فاتجاه واحد.."قالوا انه حصل تحرش بس انا مش متأكدة لانى مكنتش موجودة معاهم"..بس المهم الجو كان مكهرب وملبش جدا

قوم صاحبتنا جت ومعاها اللوح والاقلام وعايزانا نساعدها نكتب ع اللوحة"معتصمين معتصمين بس نفتح الميدان" قالت ان الميدان كان مقفول وماكانوش راضيين يدخلوا حد وموقفين الطريق..تمام اللوحة كتبتها صديقتى المؤيدة التانية وقوم انا زى الشاطرة مسكتها وبقوللها ياسسسلاااام عليكى يا هالة فنانة والله-وانا فرداها كدا عشان انا اتفرج مجاش فدماغى خالص ان الدنيا كلها اتفرجت-

هوووب لاقينا واحد واخدله بشلة وشكله الله اعلم شارب ولا مش عارف منيل ايه فنفسه بيجرى علينا ومعاه اصحابه وحرااااااااام عليييييييكوا!! بعتولنا بلطجية عايزين مننا اييييييييييه تاااانى!!!لولاشى عجلة لورا خدتها كرد فعل تلقائى كان زمانا متشوهين..

الشاب الأمير ابن الناس الأمرا جرى علينا هو واصحابه وحاشوهم عننا..

انا كنت جاية اكل ايس كريم! هو فى ايه!!!!

فجأة لاقيناهم عاملين علينا كورديون ومحاوطنا ومشبكين اديهم وكان معانا حوالى تلت بنات تانية..كانوا محاوطنا عشان ميعرفوش يوصلولنا..مش عارفة ايه اللى اتكتب وكنا ماسكينه خلاهم يفتكروا ان احنا تبع مبارك واحنا اللى باعتنلهم البلطجية!!!!!! وبعدين حتى لو بعتنالهم بلطجية..هو دا منظر يخاف من بلطجية!!!!!! وبعدين سايب البلطجية وجايلنا احنا!:@:@

طبعا لولا بس انى كنت مستعجلة ع الايس كريم اللى مكلتوش فى الاخر..كان رد فعلى هيختلف تماما بس يلا تلاقى عنده عيال وربنا مش رايدلهم يتيتموا النهارده..

واحنا فطريقنا لزهرة البستان قابلنا واحدة كانت من ضمن المناضلين اللى قابلناهم يوم الخميس اللى قبل جمعة الغضب ادام نقابة الصحفيين..انا عرفتها رغم انها خست النص وكانت قال يعنى متنكرة .

عرفت انها خدتلها 8 رصاصات مطاطية ..ايوه 8 رصاصااااات وشوفت اثار لبعضهم على دراعها..بخلاف ان الجيش سحبها مرتين وخرجت.

واحنا قاعدين ع البستان لاقينا هيصة برضه وعرفنا ان الجيش نزل الميدان ولم البلطجية..فى حين ان الدنيا حوالينا كانت هايجة قالوا ان البلطجية جايين بيشاوروا ع اللى كانوا فى الميدان عشان الجيش يسحبهم..طبعا صحبتنا ام تمن رصاصات لبست عدة التنكر وش..لانها من الوشوش اللى خلاص بقت معروفة جدا..واصحابكم بقى اللى هما احنا قلقنا-بس مش قوى يعنى-احنا برضه اتخانقنا والصينية كلها كات ملمومة حوالينا يعنى سهل نتعرف -

روحنا ناحية الميدان وبنسأل الناس حصل ايه..ردت ست شكلها ثورجية كدا بصوت عالى واشمئزاز :الجيش والوطنى مع بعض..مبروك عليكوا مبارك !!!

قعدنا نحلف اننا مش تبعه مفيش فايدة!!

اليوم دا اليوم الوحيد اللى حسيت فيه بالخطر فعلا..دا فى الايام التانية كان ناقص اروح ادوس على رجل الظابط عشان يعتقلنى ولا كأنه شايفنى! لدرجة انى شكيت انى هفأ !ماصل اللى بيعتقلوهم دول احسن منى فايه!!!

اليوم اللى اكون معرضه فيه فعلا للموت ولا للاعتقال..تكون نيتى فيه انى نازلة اكل ايس كريم!!!:S

الأربعاء، فبراير 23، 2011

البيان اللى سلمناه النهارده22 فبراير- لعمرو موسى

by Basma Bahaa on Wednesday, February 23, 2011 at 2:37am

بمبادرة شخصية من د. هانى حنا عزيز، تم يوم الثلاثاء الموافق 22 فبراير 2011، تكوين وفد دعم ثورة الشعب الليبى وبعد ترتيب لقاء عاجل بين د. هانى حنا عزيز والأمين العام لجامعة الدول العربية السيد/ عمرو موسى، توجه الوفد للقاء سيادته بمقر جامعة الدول العربية بميدان التحرير، حيث عرض سيادته على الوفد القرار الصادر من الجامعة برقم 136 – د. غ. ع – 22/2/2011 (أنظر نص البيان بأسفله).

وقد قدم د. هانى حنا عزيز قائمة بالمطالب الضرورية التى نرجو أن تتخذ الجامعة العربية إجراءات عاجلة بصددها وتتضمن:

1. تفعيل ميثاق الجامعة العربية والاتفاقيات والمواثيق العربية والدولية لدعم الشعب الليبى فى ثورته التى نسعى إلى إزالة النظام الدموى الذى يعمل حالياً على قتل الشعب الليبى وتدمير إرادته الحرة. (وفى هذا الصدد تم الاتفاق مع سيادة الأمين العام على سعى الجامعة لدى دول الجوار الليبى للعمل على التعاون مع الأمم المتحدة لتفعيل بند "الحق فى الدفاع الذى يسمح بالتدخل الدولى لوقف حالة قتل الشعب الليبى قبل تحولها إلى إبادة جماعية")

2. ضرورة عمل الجامعة بإجراءات واضحة ومحددة للمساعدة على تفعيل شرعية الثورة الليبية الشعبية بكل مفرداتها.

3. ضرورة السعى واتخاذ الإجراءات اللازمة نحو تفعيل القانون الدولى فى شأن محاكمة القذافى ونجله وعائلته وكل من يثبت عليه اشتراكه فى جريمة قتل أفراد الشعب الليبى.

4. السماح بوصول المساعدات الطبية والاقتصادية إلى ليبيا (وكنا قد سعينا لتوحيد الجهود لإرسال مساعدات عاجلة، وقد تم إبلاغنا أثناء اللقاء أنه تم إدخال قوافل مساعدات ساهمت القوات المسلحة فى تسهيا دخولها)

5. دعم وتسهيل ومساعدة من يرغب من المصريين وغيرهم من مواطنى الدول المختلفة فى العودة الفورية عن طريق مصر بكافة الوسائل المتاحة.

6. التأكيد على فاعلية دور الجيش المصرى الوطنى على حماية الحدود الليبية المصرية ضمن دوره الأصيل فى حماية الحدود المصرية.

7. دعم الجامعة للشعب الليبى فى العمل على تجميد الأموال المنهوبة وإعادتها إلى الشعب.

هذا ولقد تكوّن وفد دعم ثورة الشعب الليبى من كل من:

مصريون:

د. هانى حنا عزيز

أ. بسمة بهاء (من شباب ثوار ثورة الشعب المصرى 25 يناير 2011)

ليبيون:

د. محمد السنوسى.

أ. صالح سنوسى.

أ. غيط أبراهيم.

تونسيون:

أ. عبد الرحمن العلوى.

ولقد حضر اللقاء السيد السفير محمد على ناصر مستشار الأمين العام للمراسم،

والسيد هشام يوسف رئيس مكتب الأمين العام.

تحيا مصر، تحيا ثورة الشعب المصرى، وتعيشى يا ضحكة مصر.

السبت، نوفمبر 06، 2010

مغفلات..!!!

تفاجأ بنظراتها الثابته الجامدة الى عينيه مباشرة॥لم يكن هناك اى سابق معرفة بينه وبينها! ازعجته نظرتها وتحديقها غيرالمبرر اليه على هذا النحو..اخذ يختلس النظرات الى ملابسه ليتأكد انه لم ينس ارتداء القميص او اختلطت عليه الاحذية فارتدى زوج منها قد انفصل منذ زمن!

عندما تأكد ان كل شيئ على مايرام وانه يبدو بمظهر طبيعي بدأ يبادلها نفس نظرتها..اخذ يبحث فى عينيها عن سر هذه النظرة الجديدة عليه!..لم تكن نظرة اعجاب..لم تكن نظرة عتاب..حتى لم تكن نظرة احتقار!

على الرغم من ذلك كانت عينيها مليئة بالكلام..لكنه فشل فى ترجمة مايدور بداخلها..

ظل الوضع هكذا لمدة قاربت الربع ساعة خلال فترة سفرهم بالقطار..حتى فاجئته بحركتها وهى متجهة الى باب القطار الذى كان مفتوحا..القت بنفسها لتتحول خلال ثوان الى اشلاء !!!!!!!

بينما كان القطار يواصل مسيرته وكأن شيئا لم يكن..ووسط صراخ الفتيات الاتى تصادف وجودهن بنفس العربة..اصيب هو بشلل مؤقت..لم يستطيع تحريك اطرافه..ظل محدقا غير قادر على تحويل عينيه عن موضع الباب الذى القت نفسها منه منذ دقائق!..

بالكاد..عاد الى بيته..لاحظت والدته حالته غير الطبيعية وعدم قدرته على الكلام..اجلت الحاحها عليه لينطق بما تسبب له بهذة الحالة..استعانت باربع بطانيات لتتغلب على رعشة البرد التى كانت تسرى بجسده رغم سطوع شمس يونية!..ذهب فى نوم عميق..راودته احلام متداخله..نظراتها تلاحقه..اول حب فحياته..تخلى عنها رغم تمسكها به وتحديها لاهلها من اجله..كان يريد الذهاب للخليج..فرص العمل هناك افضل والراتب سيكون اعلى..لم يكن يريد مسئوليات..اكتشف هذا بعد اربع سنوات بعد ان علقها به..تقف بعيد ..تنظر اليه بنفس نظرة فتاة القطار!

شقيقة صديقه..التى خان من اجلها صداقته..ولعب بمشاعرها.. استطاع ان يجعلها تربط احلامها كلها مهما كانت بسيطه به ..صنع لها من البحر طحين..فقط ليثبت لنفسه انه قادر على "تظبيط"اصعب انواع البنات..تركها بعد ان تأكد من انها لن تستطيع العيش بدونه مجددا..تركها متحججا بانه يعاقب نفسه لانه خان صداقته باخيها! لم تحدق بى بنفس النظرة الغريبة التى لا افهمها!!!

ابنة الشيخ مصطفى..المتدينة التى يشهد الجميع باخلاقها الحميدة وادبها المتناهى..فرحه الشديد عندما كان ينجح فى جعلها تفعل شيئا ضد مبادئها من اجله! احساسه بالنشوة والانتصار عندما كانت تفعل ما لم تتخيل فعله معه..عندما كانت تنهار امام نفسها وامامه وتفقد احترامها لذاتها يوما بعد يوم..تحولها من انسانة قوية اقرب الى المثالية الى اخرى مسلوبة الارادة..تركها بعد علم ابيها..وكل اهلها واصدقائها ..بعد ان سقطت من نظرهم جميعا ومن قبلهم نظرها هى!..تركها محطمة خاسرة..لم ينظرن لى هكذا!!!

ترى ماذا يفعلن الان؟! كيف حالهن؟! هل هذة الفتاة انتحرت بسبب ندل مثلى؟..ندل! انا لست ندل! هن المعفلات..لن احمل نفسى مسئولية من اراد ان يخطئ ويحملنى مسئولية خطئه!!! نعم ولكن..انا من تسبب لهم فى ان يفكروا فى الخطأ اصلا! لا ليس لى ذنب..هن من كان لديهن الاستعداد للخطأ من البداية..

ولكن..

كف عن تأنيبى انا لست مسئولا عن وجود مثل هؤلاء المغفلات فى عالمى!!!

يفيق صباح اليوم التالى على صوت هاتفه المحمول ينبهه بأن هناك من ترك له رسالة..ليجدها من سارة يااه اما زالت تلك الفتاة تذكرنى! يفتح الرسالة ليجد محتواها"حسبى الله ونعم الوكيل"!

الثلاثاء، أكتوبر 19، 2010

حجاب؟!

..


-شالت الحجاب عشانه؟!
-يابنتى هى اصلا كانت لابساه كدا॥عمرك شوفتى واحدة حاطه حجاب ومبتصليش؟!

كلمة سارة صديقتى اللى قالتها وهى مستغربه جدا ان اللى اتكلمنا عنها كانت محجبة ومبتصليش॥خلتنى افتكر حاجات كتير نسيتها فوسط اللى بيحصل حواليا!॥خلتنى اركز ان الحجاب الحقيقى غير اللى بشوفه حاليا॥غير اللى البنت بتلبسه لما توصل لثانوى وحاليا فاعدادى عشان بقه تبع عاداتنا فى اللبس مش اكتر!!!!
من كتر اللى بشوفه॥ابتديت احس ان الحجاب زى قلته وان المحجبة تصرفاتها متفرقش اى حاجة واحيانا مظهرها كمان ميختلفش كتير عن اللى مش محجبة بالعكس احيانا بتبقى ابشع!
وابتديت اصدق ان الحجاب ولا حاجة وانه مجرد عادة
وابتديت افكر انى اشيله:डी
وبعد ما بتديت امهد لاهلى وافكر بقه هاواجه الناس ازاى بعد ماشيله الظهر اذن॥زى الشاطرة روحت اتوضيت و॥لبست الحجاب عشان اصللى!
قولت فعقل بالى يا حالولى!!! لما الحجاب ربنا مانزلش بيه من سلطان وكل الموضوع انه عادة اتوارثناها من زمان وان المشركين كمان كانوا بيلبسوه॥ليه ربنا فرضه عليا وقت ما بقف ادامه॥وقت ماروح ازور بيته؟!!!
بسبب تصرفاتكوا خلتونى انسى ان المحجبة ماينفعش تمشى مع واحد ع الكورنيش! مينفعش تكدب او تغش فى الامتحانات!!! مينفعش اخلاق بنت مش محجبة تبقى احسن منها بكتييييييييييير فاوقات كتيره!
مينفعش تبقى "محجبة"وانتى مش عارفه تحافظى على صلاتك على فكرة!..مينفعش تبقى "محجبة"وانتى محجبة عشان تبقى محجبة وخلاص..مينفعش تبقى "محجبة" وانتى عايشه حياتك اكتر من اجدعها متبرجه!..مينفعش تبقى "محجبة"وانتى من "معاميقك"مش محجبة!..مينفعش تبقى "محجبة"وبسببك اللى يسوى واللى مايسواش بيشتم ع الحجاب والمحجبات مستندا على تصرفاتك المتناقضه مع مظهرك!..مينفعش تبقى "محجبة"..والحجاب بدل مايضيفلك انتى اللى تقللى منه!..لو مش قد حتة القماشه اللى حاطاها على دماغك دى شيليها! وربنا ماليها لازمه! والله العظيم ماليها لازمه! عليا الطلاق ماليها لازمه:डी




الخميس، سبتمبر 23، 2010

انااا..قررت اتجوزك!!!

من اكثر ما يثير استغرابى واستهجائى واستفزازى ॥تصرف من ضمن تصرفات رجالتنا الشرقيين॥(لنقل معظمهم لانى مابحبش اعمم ..حرام عليا وابقى مفترية-ودا اللى ابعد مايكون عن شخصيتى طبعا- انى اظلم القلة القليلة اللى بتتقى الله فطريقة تفكيرها وبتقدر تحترم غيرها لانها "بتحترم نفسها" فى الاساس..)
ثقتهم فنفسهم اللى غالبا مابتكونش مبررة ..لحد كدا مفيش مشكلة
بس لما ثقتهم دى تديهم الحق انهم يتخيلوا ان بمجرد ما تعجبة واحدة يتعامل معاها على اساس انه هيشاورلها هتجرى عليه! او انه من حسن حظها انه فكر يتجوزها:डी
هنا قمة الاستعباط بجد!
يا راجل يا..شرقى..الست دى بشر! انتوا الاتنين زى بعض بالظبط فموضوع الانسانية! يعنى زى ما حضرتك كدا ليك مواصفات معينة فشريكة حياتك واللى غالبا عند الفئة اللى بتفكر بالطريقة دى بتبقى اكثرها شكلية! هى كمان ليها تفكيرها॥ليها طموحاتها واحلامها فى الراجل اللى هتكمل معاه بقية حياتها!
يعنى وارد جدا..جدددا! تكون ابعد مايكون عن هذا الفارس المغوار اللى رسمتله صورة فخيالها مش لعيب فيك لا سمح الله انت فارس لبنت مش بالضرورة تكون هى!
بلاش الثقة الزيادة دى والنبى عشان بتفقع!॥الثقة فى النفس حلوة ومطلوبه اه॥مقولناش حاجة وربنا
بس لما تعدى معاه لدرجة انه يتخيل انه لو شاور لاى واحده مهما كانت هيغمن عليها م الفرحة! لا بقى ستوووووووووب:@:@!
من ضمن النماذج المسببة لسقوط او وقوف مفاجئ لشعر الرأس وحبس الدم فى الدماغ وظهور جزرة صغيرة زى بتاعة توم كدا من الفقعة!..
-تعرفى؟ انا لو فكرت فى الارتباط॥هتكونى انتى اول واحدة هروح ارتبط بيها!!!!!!!!!!!!!!
-من تعاملى معاكى॥انا وجدت فيكى كل الصفات اللى بتمناها تكون موجودة فشريكة حياتى॥عشان كدا॥استعدى ها;))
انا قررت اتجوزك!!!!!
-بس لو تغيرى طريقة لبسك وكلامك॥لو تغيرى طريقة تفكيرك॥دماغك॥والله اجىب اهلى واجيلكوا البيت بكرة!!!!!
طب بصوا ع اللى جايه دى بقه:))))))
"راجل"॥واخدين بالكوا انتوا "راجل" بيسأل واحد صاحبه॥واخدين بالكوا انتوا" صاحبه"! قوللى يا فلان॥اتجوز دى؟ ولا دى؟؟ قوم صاحبه يقولله دى॥والكارثه بقى! انه يروح يتجوز اللى اختارهاله صاحبه فعلا!!!!!!

حد يفهمنى ارجوكوا॥ايه دا؟! قد كدا الراجل من دول مهمش من المرأه واختصرها فمجرد كائن عايش عايز اى راجل بدل ضل الحيطة॥كتغيير يعنى!!!!!!!!!!!!!
عارف انك فى الحالة دى॥هتبقى فحياتها فعلا مش اكتر من شمسية لامؤاخذة؟ مكنة صرف فلوس على اقصى تقدير؟! لو هى دى اللى بتدور عليها يبقى انت كمان اللى هى مستنياه
مجرد راجل يصرف عليها وتستعملك فحياتها كبديل للحيطة!!!!!!!!
عزيزى الرجل الشرقى॥لا اتمنى لك ان تختزل شخصيتك وكيانك وتضحى بعمرك مع شريكة حياة॥لا ترى فيك اكثر من كونك "مظلة"!

الاثنين، سبتمبر 06، 2010

عندما تصبح الحياة عبئا!



مكان يشبه قاعة استقبال لاوتيل.. كراسى وكنبة حيث يتمدده "محمد" ..اقترب اليه واجلس بجانبه
امسك بيده فى غير استغراب انه من المفترض "ميت" وانه من غير الواقعى ان اراه حى مرة اخرى بعد ما دفنه ابى وزارته امى فى قبره!
-ماتيجى معانا يا بسمة؟
-لا مش هينفع
-ليه؟
-عايزه اعمل حاجات كتير لسه.. عشان ماما وبابا.. مش عايزه اكون سبب فحزنهم.
حولى اصدقائى يستعجلونى على الرحيل معهم.. وترك محمد..
------------
لا اعلم ما سر حنينى لاشخاص كثيره قد غادرت عالمنا.. بلا رجعة..
جدى الذى ما زلت احلم به وبانى سوف اجده حيا يوما ما رغم مرور مايزيد عن تسع سنوات على وفاته..
ربما لانى احسدهم على رحيلهم؟ ام لانى شعرت بقدر اهميتهم فعلا بالنسبة لى بعد رحيلهم وادراكى انى فقدتهم للابد؟
هل سالتقى بهم عندما اموت انا الاخرى؟
اشياء قليلة جدا التى تربطنى بالحياة
ابى الذى سمعت انه فقد وعيه اكثر من مرة وهو يدفن محمد ابن اخوه وابن عمى..تفاجئت كثيرا عندما علمت هذا عن ابى
لم اكن اتصور انه من ضمن من ينهارون عند موت اقاربهم.. يحزن ولكن ليس لدرجة الانهيار
لم يفعلها مع ابيه!
دائما ماكنت اسمعه يقول الموت علينا الحق ومحدش هيخلل فى الدنيا! وانا لله وانا اليه راجعون
كان شديد التماسك فى مثل هذه المواقف.. حتى توفى محمد..
يومها ادركت انى اذا مت فلن يكن متماسكا مثل ما تصورت انه سيكون..
وامى مريضة السكر..لن تحتمل مثل هذا الموقف.. لا اريد ان احملها مزيد من الاحزان..
اخوتى سيحزنون نعم.. سيبكون.. نعم..ولكنهم سينسوننى ..
صديقتى الحبيبة هالة ستحزن وستكتئب.. ولكنها ستنسى يوما ما
لا اعتقد انى ساكون متمسكه بحياتى فعلا وراغبه فيها الا عندما اكون ام
عندها سيكون من الانانية فعلا
ان اتمنى ما اتمناه الان
سئمت من البشر
من الحياة
من الوحدة التى لم تمنعنى من ان ارفض الكئير ممن يحاولون اقتحام حياتى وملئها
لا اعتقد ان مازال لدى طاقة كى احتمل المزيد..
لم اعد اثق بمخلوق

لولا ان ثفتى فنفسى مصدرها ثقتى فربى لكانت انضمت الاخرى ضمن قائمة المفقودات
لا اعلم متى ساشعر بفرحة القلب المزعومه! لا اعلم فعلا هذا الشعور لم اذقه من قبل!
ليس امامى سوى الصبر
ليس بيدى اى شئ اخر يمكن ان افعله..


الجمعة، سبتمبر 03، 2010

ذل..

اتبهدلت من بعدك
حياتى بقت من سئ لاسوأ
مش بايدى الدنيا خدتنى منك
غصب عنى بعدت عنك
بس حبك فضل فقلبى
متاثرش باى حاجة
انت الوحيد اللى كان حبك بيقوينى
ذللى ليك بيزود عزتى وثقتى فنفسى
كل يوم بضعف عن اليوم اللى قبله
كل يوم بحتاج للناس تكون حواليا
حواليا ناس كتير
كتير قوى
ومع ذلك وحيده
انا فاكرة زمان
لما كنت وصلت لانى اقول لنفسى لو ماما ماتت مش هيهمنى
مدام انت معايا
حتى لو بقيت لوحدى فى الدنيا دى
لا معايا اصحاب ولا اهل ولا اخوات
مش هيهمنى
طول مانت معايا
كنت بحس انى قوية جدا
اقوى حد فى الدنيا دى
وكنت واثقه انى اقدر اعمل اى حاجة مهما كانت صعبة
مانا حبيبى رب العالمين
وقادر على كل شئ
اتعب انا واتوكل عليه
وهو قادر يحققلى اى حاجة
وفعلا
كنت قبل حتى مادعى
كنت بتستجيبلى
وكنت بتخلينى احس باللى هيحصل
من قبل مايحصل
وانا معاك كنت بحس انى نقية
وكان دا باين على وشى
ربى..
لو كان العذاب اللى شوفته لما بعدت عنك دا
تكفير لذنوبى
انا راضية
بس اللى مش هتحمله فعلا
انك تبعدنى عنك بعد ماتدوقنى حلاوة قربى منك
انى اتذل كدا من بعد القوة اللى حسستنى بيها
يارب
سامحنى
الفجر بيأذن اهو
يارب
انا عايزة ارجعلك
بس مش عارفه
يارب ساعدنى!
يارب قوينى
يارب ..... اهدينى!!
انت وحشتنى!:'(((