الحج جوجل لو حد عايزه فحاجة

الثلاثاء، أغسطس 07، 2012

للسيدات والرجال "اللى بتفهم" فقط!

هو اللى قاللى اكتبي والله هو اللى قال, ووالله لانا كاتبة اللى نفسي من زمان اكتبه وساكته
بصوا بقا يا برنس منك ليها..انا اه اتنين وعشرين سنة بس شاغلنى جدا حوار سن اليأس دا..مش هو فحد ذاته اللى شاغلنى لااا بالعكس..ابسلوتلى! كل اللى قالقنى جهل البنى ادمين بخصوص الموضوع دا
طبعا انتوا عارفين ان الستات مزاجهم متقلب جدا معظم الوقت..بسبب التغيرات الفسيولوجية الكتيرة جدا اللى بتحصلها طول عمرها من أول المحيض لحد نهاية عمرها مرورا بتغيير الهرمونات المصاحب للحمل والولادة والرضاعة واكتئاب ما بعد الولادة, اقل حاجة ممكن تبرر سوء مزاجها فى الاوقات دى انى اقول معلومة زى ان بيبقى فى خلايا مية بتتواجد بكثرة وبتضغط على المخ فبيخلي الست عصبية جدا وأميل للاكتئاب
على فكرة..عملوا دراسة بخصوص الموضوع دا واكتشفوا ان معظم جرايم القتل والانتحار اللى الستات بتعملها..بتعملها فى الوقت دا
كنت فى الأول متأزمة نفسية جدا ان ربنا بيمنع الستات من الصلاة او يلمسوا المصحف أثناء المحيض..كنت بفهم دا على ان الستات ممنوعين من الوقوف ادام ربنا بسبب نجاستهم وقتها..وكنت بقول لنفسي لا اله الا الله! طب مانت ياربى اللى خالق الموضوع دا هو كان بمزاجنا!!!!
طلعت غلطانة جدا..ربنا أعلم العالمين بكمية الضغط النفسي اللى بتبقى فيه الستات وقتها..عشان كدا شال من عليها حمل الصلاة :)
نرجع لمرجوعنا..سن اليأس, الحالة -المؤقتة-المنيلة بستين نيلة اللى بتصاحب وقت المحيض من كل شهر, بتكون فسن اليأس دااائمة..يعنى الاكتئاب والضغط العصبي واحساس ان الدنيا سواااد دا..بيبقى معاها لحد ماتقابل وجه كريم.
بالاضافة الى انها فى الوقت دا بيبدأ جسمها فمرحلة الهدم بالصلاة ع النبى..الجسم بيبتدى يستنزف مخزون الكالسيوم اللى عندها  (يعنى وجع عضم) وقلة نشاط, يعنى قلة انجاز..بالاضافة الى انها اصلا عندها استعداد جدا للاكتئاب
وهنا بقا الستات الحلوين اللى قرروا ميشتغلوش ويعيشوا عشان اولادهم وابوهم..الاولاد هيكونوا كبروا الحمد لله ومبقاش حد فاضيلها, وانتوا عارفين الرجالة بعد الاربعين ولا الخمسين:))..يعنى اللى كانت عايشة عشانه بخ..بالاضافة الى يقينها بانها خلاص كدا مستحيل هتخلف تانى بتترجمه على انها مبقاش لها عازة..الحياة بتسود.. وكفاية انا كمان احكى فسوادها دلوقتى
بصى يابنت الحلال..مينفعش تضحى بانك تشتغلى ابدا, اهو ع الاقل تلاقيلك حاجة فى الوقت دا تحسسك ان لسه فى حاجة بتعمليها فحياتك, والرياضة بتساعد جدا انها تحسن مزاجك وقتها, حاولى تفرفشى وتدندشى نفسك كدا ومتستنيش السعادة من حد..عشان غالبا محدش هيبقى فاضيلك:))..الا لو كلامى دا قراه رجالة بتفهم..وقدمت لزوجاتها الدعم والحب اللى هتكون فى أشد الحاجة اليه وقتها.
وعلى طول والله!:))

فوتتكم بعافية


هناك 6 تعليقات:

  1. والله يابنتي برغم انك بتقولي كلام محرج..بس عداك العيب
    خوفتيني على نفسي من بكرة من غير شغل :(

    ردحذف
  2. يابنتى وربنا امسحه:@

    ردحذف
  3. بسمة الموضوع جامد جدا, بلوجاية راااااااائعة فوق الوصف وكان لازم تتكلمي في الموضوع بتوسع, وانا معاكي ان الست بعد ال30 لازم تشتغل لان وقتها هي حطت الاساس في اولادها وعلمتهم يعتمدوا علي نفسهم وجوزها اصلا لو بيحبها وبيحترمها ومقدر معني كلمة مشاركة مش هايقول حاجة بالعكس هايشجعها انها تلاقي نفسها...
    في طباخة امريكية في ال50 كانت متجوزه من سفير امريكي في اوروبا كان, اول ما تعرفت عليه سابت شغلها الحكومي ورسخت نفسها للبيت بس مع الوقت بدات تحس ان هي مبتعملش حاجة وخصوصي انها كانت عاقر ولما دخلت سن اليأس تعلمت الطبيخ وهو شجعها وشوية شوية بدات تعلم الامريكان اللي في امريكا ازاي يطبخوا اسمعا ( جوليا ) لكن جوليا ايه؟ مش فكره هابقي اجيب ليكي بقيت تفاصيل عنها.
    بس برافو عليكي بجد ابهرتيني اختصرتي وانجزتي وحاولي تتكلمي فيه بتوسع شوية.

    ردحذف
  4. حياة قلبي يارب يخليكى يا رافعة معدنياتى انتى
    انا عارفة الفيلم دا على فكرة حلو جدا

    ردحذف
  5. بصي يا ضنايا
    انتي عرضتي المشكلة والحل في نفس ذات التوقيت ودي حاجة كويسة
    بس شايفة الخوف من فترة سن اليأس دي مش مبررة
    بالعكس دي الست بتكون فيها حرة ومنطلقة ومش خايفة من حاجة أكتر بكتير
    فكرة بقا الاكتئاب والضغط العصبي اعتقد بيبقوا نابعين من كونها بتفكر انها مش هاتخلف تاني ف ربما تكون ثقتهافي نفسها بتتهز شوية من النقطة دي
    لكن لو هي حاسة بأهمية نفسها وخالقة لنفسها مجتمع وبتعرف تستفيد من وقتها كويس مش هايبقا عندها وقت تكتئب اصلا وهاتبقا شباب اكتر
    وليكي في نيللي اسوة حسنة :D:D
    الدندشة هي الحل على رأيك
    يعني تشتغل يبقا ليها كاريرها الخاص
    هوايات بقا مزيكا ترسم تخرج تسافر تروح تيجي المهم ماتهبطش خالص
    ماعتقدش ان وقتها هايبقا في وقت تكتئب :))

    ردحذف
  6. مش داخلة باسمك ليه ابت اهالة؟ انا عرفتك م المزيكا والرسم والفن والتنطيط:)))) انا كدا اطمنت عليكى

    ردحذف