الحج جوجل لو حد عايزه فحاجة

الأربعاء، أغسطس 15، 2012

في حاجة غلط

كنت بحاول احل اسئلة لاختبار تحليل شخصية..وخير اللهم اجعله خير حسيت انى عايزة استعين بصديق
انا معرفش حاجات كتير جدا عن نفسي
انا حتى لسه من خمس دقاق عرفت عنى انى جبانة
مع انى طول عمري قوية ومعروف عنى جرأتي وشجاعتى هع..يمكن اتغيرت مؤخرا..
مكنتش بعرف انام وحد زعلان منى ومتخاصمين وخصوصا لما الحد دا يكون بيهمنى..
بس لما الحد داهون ينام عادى؟
أكيد مع الوقت هتعود انا كمان..وبقيت انام كويس جدا..
كنت بخاف ع اللى بحبه جدا من حرقة الدم
وكانت حاجة مستحيلة بالنسبة لى اعمل حاجة وانا عارفة انها ممكن تزعله أو تنرفزه..
-حاجة منطقية تكون كدا مع الناس اللى بتحبهم وتخاف عليهم على فكرة:))-
بس لما تلاقى اللى بتحبه واللى المفروض بيحبك بيتبع الأسلوب دا كتير أول ماحاجة تضايقه منك؟
أكيد مع الوقت بقيت أقدر أعمل كدا انا كمان..
بس عارفين
الطبع بيغلب التطبع
مش عارفة هقدر استمر ف الأسلوب دا ولا مش هقدر..
طب عارفين كمان انى اعرف ناس بتستخسر تعمل حاجة حلوة مع حد بتحبه لمجرد انها اتعودت وجوده؟
ناس عندها حاجات حلوة كتير..بس شايلاها للناس اللى متعرفهمش كويس
الناس دى بتفكرنى بالست اللى عايزة تكسب حماتها..فتعاملها معاملة لوز قوي وايدك ابوسها يا ماما ولا لا عنك المقشة يا ست الحبايب!
وهى متعرفش حاجة عن أمها الحقيقية اللى نسياها ف البيت..!
ناس محتاجة اعادة توجيه لكل تصرفاتها
تخللى كدا قلة الذوق مع الناس قليلة الذوق..وقلة الاحترام مع اللى مش محترمين..تخللى اهانة الكرامة للناس اللى تستاهلها او معندهاش منها اساسن..وتخللى كل حاجة حلوة جواها للناس اللى بيحبوهم!
فى حاجة غلط !..
بس الغلط  الكبير..انك تعتبر الناس دى بتحبك فعلا:)

هناك 12 تعليقًا:

  1. عايزة اقولك ان في حوار تحليل الشخصية دا انا بذات نفسي كنت بستعين بيكي وبسالك هو انا كذا ولا كذا ولا نسيتي ؟؟ لاني كنت بحس ان انا الحالتين مش حالة واجده وكان لازم يكون في اجابة تالته اسمها الاتنين معاً لامؤخزه يعني ....
    بالنسبة للحوار التاني اللي بتتكلمي فيه مش هقدر ارد عليه لان انا الاشكال دي انتي عارفه انا بتعامل معاهم ازاي بعتبرهم حشرات وبدوس عليهم بجذمتي لانهم اكيد ميستهلوش حتي اني افكر فيهم ... اللي يسبني زعلانه او اللي ميحسش بزعلي ميلزمنيش وخالي بالك احلام ميستغنامي في كتاب نسيانكوم قالت ليكي اللي بيبكيكي وبيسهرك ويقلقك لا يستاهل حبك لانه لو بيحبك مش هايعمل كده ... الكتاب عندك يا موزة محتاجة تقريه تاني عن ذات ناسي كل كام شهر برجع اقراه تاني لما بمر بوعكة قلبيه :D

    ردحذف
  2. انتى استعنتى بيا فسؤال كان عن رأي اصحابك فيكى :)) اختك بتتسأل عن نفسها مش عارفة ترد

    اه..الكتاب عندى..بس شكلك انتى اللى نسيتى ان أحلام استعبطت هى كمان وخلت اللى سافر ومعرفش عنها حاجة بتاع سنة وشوية بطل قومى وانها كانت ظالماه ههههههههههههههه
    هه!
    نورتينى يا هوبتى

    ردحذف
  3. الحقيقة سعيد جداً بتعرفي على مدونتك فهي تحمل تنوع أدبي ومعرفي وإنساني ولغة بسيطة وتلقائية غير معقدة وسلسة تصل للقلب والعقل بيسر، لذلك لم أكتفِ بتدوينة واحدة فتدوينتك الأولى شدتني لتدوينة أخرى وهلم جرا زي مابيقولوا
    فمن التدوينات التي لفتت نظري وأعجبتني جداً
    تدوينة (في حاجة غلط )
    تحمل بوح وفضفضة كان سببها تراكمات ورواسب كثيرة لشكل العلاقة مع أخرين اقتربوا منا واقتربنا منهم دون غيرهم على مدار عمرنا ،الحقيقة ستي الله يرحمها كانت دايما تقولي ياواد ياحسن المثل بيقول ( من حبنا حبناه وصار متاعنا متاعه، ومن كرهنا كرهناه ويحرم علينا اجتماعه )
    تدوينة (بسمة وصدمة الطفولة)
    هي امتداد لنفس الحالة في تدوينة في حاجه غلط

    تدوينة ( ذل)
    خواطر عامية جميلة فيها شيئ من الصوفية

    تدوينة (عندما تصبح الحياة عبئاً)
    الحقيقة تلك التدوينة مؤثرة جداً جداً يمكن لأنني من الناس الذين يشغلهم فكرة الموت باستمرار ورحيل من رحلوا عنا
    تدوينة (حجاب) وتدوينة ( وأنا قررت أتجوزك)
    تدوينة ( مغفلات)
    قصة قصيرة رائعة تدلل على ملكة الكتابة لديكِ في بحر القصة القصيرة والحقيقة صدر القصة كُتبَ بتقنية أدبية ذكية جميلة جدا كمفتاح أو كمدخل لشخصية بطل القصة )
    تدوينة (وياريتني كلته ) ( الأيس كريم )
    الحقيقة سوء هذا الفهم حدث مع أخرين كتييييير

    تدوينة (من نفسي)
    الواحد لازم يكون نفسه مش حد تاني

    تدوينة (أشوف شبحك بخير )
    وهو موضوع الحب عبر العالم الافتراضي والحقيقة حول هذا الوضوع كتبت عنه تدوينة شبه شعرية اسمها ( أيقونة ) ان احببتي ان تقرأي في هذاالموضوع تناول مختلف

    تدوينة (فهل أخطأت ) تدوينة رائعة وديالوج وهمي ولكنه على أرض حقيقية وجميل جداً خاتمته التي تقول (لى كلٍ, حين أجدك فاعلم حبيبى
    أن فتاتك خافت ان تعيش قبلك ، فأحييها انت بكذبة ستصدقها،واخبرها بانه"لا داعى للخوف معك")
    تدوينة (بسمة بنت بهاء اتألشت من الشغل)
    الحقيقة تلك التدوينة برغم منطقيتها الشديدة الا أنها ساخرة جداً وقد أخرجت مني ضحكة عالية كنت في حاجة اليها عندما قرأت لكِ (كل مكان اروح اشتغل فيه بيبقى عامل زى الخرابة اللى لازم يطلعلنا منها عفريت
    امتى بقا اكون انا العفريت بتاع الخرابة اللى شغالة فيها!)

    تدوينة (للسيدات والرجال )
    وموضوع سن اليأس موضوع سابق لأوانه أن تشغلي نفسك به الا فقط من باب المعرفة بالشيئ

    كل عام وانتي بخير
    سعدت بزيارتك وبتوقيعك في مدونتك فقط كنت أتمنى أن أقرأ لكِ تحليل ونقد فني لتدوينتي ككاتبة صحفية تبتعد عن المجاملات والتوقيعات
    تحياتي
    حسن أرابيسك

    ردحذف
  4. دا أنا لااااازم اتعلم النقد مخصوص عشان اعرف انقد زيك كدا وافرح الناس اللى بعلق عندهم:))) لازم لازم يعني
    انا متشكرة جدا لمرورك ولتعليقك
    الله يكرمك ياحسن

    ردحذف
  5. كده مش حاجة واحدة غلط..
    دي حاجات كتيييير غلط..!!

    ردحذف
  6. ادعي يا تيمو ربنا يصلح المايل
    احسن مصر كلها عزلت على سطوح برج ايفل كدا:)))
    نورت

    ردحذف
  7. يااااااه زى ما تكونى بتتكلمى عنى , انا اللى تقصديها انا اللى بتدلع حماتها وبتنفض لامها وانا برضه اللى بجرى ورا اصدقاء لايمثلوا اى شئ فى حياتى بس عارفه ؟ احلى حاجه انى لما اتلبيت على قفايا لبه محترمه ؟ فقت وحرمت وقلت حقى برقبتى

    ردحذف
  8. عرفتى بقا أهمية القفا؟ دا مهم جدا والله يابنتى:))) نورتينى

    ردحذف
  9. ياختى منور بصحبته بس والله انا لم ولن اجهل أهميه القفا ده انا حتى طول عمرى براعى انى مجيبلوش الاذيه بس كل ماخد بالى الاقى القفا جايلى من حته مش واخده منها ولا خوانه ولا ساتر

    ردحذف
  10. هههههههههههههه معلش محدش بيتعلم ببلاش;)

    ردحذف
  11. دعوة
    الحب لايعرف الأرهاب
    هي قطعة أدبية جديدة ومتفردة وجريئة للكاتبة الرائعة/ سهى زكي من جريدة أخبار اليوم
    وسهى زكي عندما تكتب من واقع تجربتها الصعبة في الحياة كأمرأة تكتب ما بكل ما أوتيت المرأة وهي وحيدة من صلابة ومن ضعف وحب شوق و حزن ووحدة .
    ورغم أني لا أحب تصنيف أن هناك أدب للمرأة وأدب للرجل ، إلا أن أدب سهى زكي يحمل في رحمه تجربة المرأة بكل أبعادها الانسانية في فرحها غير المكتمل وفي حزنها الذي لايميت
    مدونة سهى زكي ، مدونة لمن يستحق أن يقرأها
    http://soha-zaki.blogspot.com/

    ردحذف
  12. متشكرة على دعوتك يا حسن واسفة لسه شايفاها حالا

    ردحذف