اما بعد..

تنتهى من اعداد الطعام لأطفالها لتحاول ان تختطف ولو نصف ساعة تريح فيها جسدها ..الراحة التى الزمتها ان تجبر اطفالها على النوم ايضا..
بعد ساعة انتصرت عليهم ..بدأوا فى تناول الارز بلبن مع الملائكة اخيرا!
استلقت اعتقادا منها ان النوم ينتظرها بفارغ الصبر وقد تأخرت هى عليه!.. يبدو انه زهق وطار!!
تغمض عينيها فى اصرار محاولة ان تستدعيه مرة اخرى فى استعطااف!

كانت فى بداية الثلاثين من عمرها..ملامحها تنم عن جمال طاغ قد توارى خلف بشرة مهملة ووجه تشع الهموم منه!!!!!!!..جسم ممتلئ الى حد ما..شعر يعطى أمل انه سيبدو فى حالة جيده اذا تم الاعتناء به!
ملابس تخبرك من اول نظرة ما الذى تم طبخه خلال الاسبوع..
فجأة..وبدون اى مقدمات!..رسم لها خيالها صورتها..صورتها التى كانت تحلم ان تكون عليها عندما تصل الى هذه المرحلة من مراحل عمرها..
امراة جميلة,انيقة,قطعت شوطا طويلا تجاه ما تحلم به لكن احلامها لم تنتهى بعد..تجلس على مكتب فخم..حولها مجموعة من الصحفيين..تتناقش معهم فى قضايا الاسبوع والافكار الجديدة التى لم تنفذ بعد..
تنتهى من الاجتماع لتدخل مكتبها سيدة يبدو عليها الفقر..تعرض عليها مشكلتها فى شئ من الكبرياء –غير مضطره لاذراف المزيد من الدموع فهى تعلم جيدا ان طلبها مجاب-كانت ارملة وبالطبع تتمنى ان تحصل على معاش زوجها قبل ان تذهب له هى الاخرى!!
تليفون منها لوزيرة الشئون الاجتماعية..انتهت المشكلة!
تستقبل عدة حالات مشابهه لتفعل ما بوسعها لتساعدهم..تنزل بنفسها الى الاحياء الشعبية لترى بنفسها مشاكل الفقراء –ربما لم يملكون ثمن المواصلات ليصلوا اليها-..
تعود على بيت والديها لتباركلهما اداء فريضة الحج..فطالما حلمت ان تهاديهما مثل هذه الهدية لترد ولو جزء بسيط جدا من جميلهما عليها..كانت تتحمل مشقة الدراسة وتعب اعصاب الامتحانات والسهر وحياة الصعلكة التى لازمتها فى بداية مشوارها من اجل هذا الهدف تحديدا..ويأتى وراءه عدة اهداف تقل عنه اهمية نعم ولكنها مهمة جدا بالنسبه لها ايضا..

-مامااااااااااااااااااااااا اسلام ضربنى!!!

تفيق على صوت ابنتها دنيا ليتضح لها ان اطفالها قد قضوا على كل اطباق الارز باللبن واستيقظوا مجددا وبكل نشااااط وهى لم تنم بعد!!
تذهب لتفض الخناااق بعد عنااء وتستعد لأخذ حمام و"سشورة"شعرها ولكن يبدو ان زوجها قد عاد من العمل..
لا مفر من اعداد الطعام له اولا..

-فين الأكل؟؟
-حالا هيكون جاهز.
اثناء تناوله للطعام..ينظر لها طويلا ليقول
-اتغيرتى!
-اتغيرت ازاى يعنى؟!
-مبقتيش ايمان اللى انا حبتها وخطبتها!..فاكرة ايام الخطوبه كنت عامله ازاى؟؟؟..رقة اييييه وجماال ايييه وثقااافة ايييييييييييييه و..
-.......!!!!
-دلوقتى..:S..انا مش عارف ليه الستات بتتغير كدا بعد الجواز! الواحد مننا يا عينى يكون فاكر نفسه متجوز ست واحده بعد الجواااز بتقلب على حاجة تانية خااالص!! وبعدين ييجوا يلوموا ع الراجل اللى يبص برا ولا يخون مراته! ييجوا يشووووووووووووفوا!!
-لا بقى مانت متعملش فيا كل دا وتيجى بعدها تقولى ايه اللى حصلك!!!
-نعم؟! قصدك ايه ان شاء الله؟؟!!
-يعنى يا استاذ انت حبيت ايمان البنت الطموحه البنت اللى مفيش حاجة تهتم بيها غير نفسها! يومها كان كله عشانها هى مش عشان اربعه غيرها!!!
-يعنى ايه؟ بلاش اقولك ع الحاجات اللى اتغيرت فيكى عشان تغيريها وترجعى زى ما كنتى!!!
-لا والله؟ ارجع زى ما كنت؟! عايزنى ارجع زى ما كنت بعد ما سيبت كل حاجة عشانك؟! انت عارف انا ضحيت بايه عشان اعرف الاحق عليك وع العيال! انا ضحيت ب 19 سنة اشغال شاقة ومذاكرة وتعليم وتنطيط عشان اتدرب قال يعنى هشتغل بعدها!!!
..انا ضحيت بحاجات كتير اووووووى كنت عايشه عشان احققها! انت عارف يعنى ايه بقيت حاسه انى كومودينو بالنسبالك!!!
كل علاقتنا ببعض انك تيجى تاكل وتنام ويوم مابتتكلم معايا بيبقى عشان تتريق عليا واتغيرتى وماتغيرتيش!!!
لو فى حاجة اتغيرت فيا من ساعة ما كنا مخطوبين..فانت المسئول عنها لان مفيش حاجة جدت فحياتى غير انى اتجوزتك!!
-......!