الحج جوجل لو حد عايزه فحاجة

السبت، ديسمبر 08، 2012

اتقي شر من أحببيت

عارف ايه اللى هيحصل لو حبيت؟

دايما هيكون فى بينكوا حد بيحب التاني أكتر..حد الغيرة بتجننه أكتر..حد مبيعرفش ينام والتانى زعلان سواء منه او من غيره ,
الطرف التانى كل حاجة اقسمها على اتنين ومعاك تلاته واربعة وانت طالع..عادي جدا يفضل ميعرفش عنك حاجة بالاسبوع عشان حصل بينكوا شد بغض النظرمين الغلطان..عادي جدا يكون عارف ان تصرف معين بيزعلك ويحز فنفسيتك جدا ومع ذلك يعمله مرة واتنين وعشرة لانه عارف انك هتسامح..حد لو غار عليك بيبقى عشان انت مطلع عينه وواقفله ع الواحدة فبيوريك شوية م اللى بتعمله فيه مش أكتر..
انت أي طرف فيهم؟ وتحب تكون أي طرف فيهم؟

لو انت من الناس اللى بترضى مزاجها وحياتها تبقى تحت أمر حد تانى يبقى نصيحة متكملش البوست دا

أما لو كنت شاري أو شارية دماغك..بتخافى أو بتخاف على نفسك, يبقى بدل ماتوجع دماغك بانك تتقي وماتتقيش..متحبش م الاول احسن



ليه العلاقة المريضة المتطفلة دى م الاول؟! ليه حد يكون عايش ع التانى وكمان بيبقى حاسس ناحيته بذنب لانه مش عارف يرضيه ويرضى توقعاته "الاوفر" بالنسبه له!

متحبش احسن

اه والله! تخيل علاقة احترام وتقدير تدوم العمر..ولا حب ممكن تصحى الصبح متلاقيهوش؟ غير الشخرمة والمرمطة اللى بتشوفها خلاله؟!

ازاى بقى متحبش؟ ودى حاجة مش بارادتنا وبتاع..الكلام دا مش حقيقي


شوف يا سيدي ..مراحل الحب لازم تكون عارفها عشان تقدر تلحق نفسك فأول ولا تانى مرحلة بالكتير وتفرمل
وتلف وترجع تانى قبل ماتقع الفاس ف الراس

أول مرحلة بتلاحظ على نفسك انك أصبت بعمي جزئي..مش شايف من البنى ادم اللى قلبك نشن عليه غير كل حاجة حلوة..مفيهوش غلطة! ودا طبعا مستحيل يكون حقيقي لان الكمال لله سبحانه وتعالى زى ماحنا عارفين.

ف المرحلة دى لازم تخللي بالك وتركز مع نفسك وتفرمل كدا وتصللى ع النبي..لازم تحاول تشوف عيوب البنى ادم اللى ادامك دا كويس جدا ..بص اتصرف طلع عيوبه بأي طريقة حتى لو هتخترع:))

المرحلة اللى بعدها..
رجعت فكلامي مش هكمل المراحل..ماصل أول مرحلة دى هى أخطر مرحلة..لو عدت عليك هتتصدم كتير جدا على ماتستوعب انك بتحب بنى ادم طبيعي مش ملاك! هتتصدم كتير..

كله يخللى باله من نفسه بقى

سلام

هناك 3 تعليقات:

  1. التدوينة رمادية جداُ برغم قربها من الواقع

    وجملة
    ه والله! تخيل علاقة احترام وتقدير تدوم العمر..ولا حب ممكن تصحى الصبح متلاقيهوش؟ غير الشخرمة والمرمطة اللى بتشوفها خلاله؟!

    الحقيقة تلك الجملة السابقة جملة دسمة جداً رغم ايجازها الشديد وهي خلاصة التدوينة كلها
    تمنياتي لكي بالتوفيق في حياتك العملية والعاطفية والأسرية
    تحياتي
    حسن ارابيسك

    ردحذف
  2. التدوينة رمادية جداُ برغم قربها من الواقع

    وجملة
    ه والله! تخيل علاقة احترام وتقدير تدوم العمر..ولا حب ممكن تصحى الصبح متلاقيهوش؟ غير الشخرمة والمرمطة اللى بتشوفها خلاله؟!

    الحقيقة تلك الجملة السابقة جملة دسمة جداً رغم ايجازها الشديد وهي خلاصة التدوينة كلها
    تمنياتي لكي بالتوفيق في حياتك العملية والعاطفية والأسرية
    تحياتي
    حسن ارابيسك

    ردحذف
    الردود
    1. ههههههههه واضح انك تمنيت تمنيت يعني
      بفرح بتعليقاتك
      ربنا يوفقك انت كمان فكل حياتك يارب

      حذف